ՀԱՊԿ որոշ պետություններ միջազգային հարթակներում չեն պաշտպանում իրենց դաշնակիցներին

Երևանում մեկնարկել է Հավաքական անվտանգության պայմանագրի կազմակերպության Խորհրդարանական վեհաժողովի (ՀԱՊԿ ԽՎ) խորհրդի արտագնա նիստը։ Նիստը նախագահում է Պետդումայի նախագահ Սերգեյ Նարիշկինը: 2016 թվականին, ՀԱՊԿ-ը նախագահում է Հայաստանը, բայց անցած տարեվերջին անսպասելիորեն որոշվեց, որ ՀԱՊԿ-ի գլխավոր քարտուղարի պաշտոնում Հայաստանի ներկայացուցիչ չի նշանակվի, այդ պաշտոնում մեկ տարի ևս կշարունակի մնալ Նիկոլայ Բորդյուժան։ Հավաքական անվտանգության պայմանագրի կազմակերպության խորհրդարանական վեհաժողովում հայկական պատվիրակության ղեկավար Էդուարդ Շարմազանովը կարևորել է, որ ՀԱՊԿ անդամ պետությունները և դրանց խորհրդարանական պատվիրակությունները միջազգային հարթակներում մշտապես դրսևորեն հավասարակշռված դիրքորոշում և հանդես չգան այնպիսի հայտարարություններով, որոնք չեն բխում ոչ միայն ՀԱՊԿ անդամ առանձին պետությունների, այլև ՀԱՊԿ ընդհանուր շահերից:

Նրա խոսքով՝ ցավոք, երբեմն բախվում ենք դեպքերի, երբ ՀԱՊԿ անդամ որոշ պետություններ միջազգային հարթակներում ոչ միայն չեն պաշտպանում իրենց դաշնակիցներին, այլև հաճախ հանդես են գալիս այնպիսի դիրքորոշմամբ, որը հակասում է ՀԱՊԿ-ի պաշտոնական դիրքորոշմանը

«Սա անթույլատրելի է, և մենք պետք է անենք հնարավորը՝ նման բացասական երեւույթներն ապագայում բացառելու համար»,- շեշտեց Է. Շարմազանովը:

Շարմազանովը նաև ներկայացրեց իրավիճակը հայ-ադրբեջանական սահմանին. «Մենք մշտապես հանդես ենք եկել և շարունակում ենք հանդես գալ բոլոր հիմնախնդիրների, մասնավորապես՝ ԼՂ հակամարտության բացառապես խաղաղ կարգավորման օգտին ԵԱՀԿ Մինսկի խմբի ձևաչափով` երեք հայտնի սկզբունքների հիման վրա: Ռազմական հռետորաբանությունը, ուժի կամ ուժի սպառնալիքի կիրառումը պետք է ոչ միայն անթույլատրելի լինեն, այլև դատապարտվեն բոլորիս կողմից: Մեր կազմակերպության համար կենսական նշանակություն ունի իրերն իրենց անուններով կոչելը: Միայն այդ դեպքում մեզ կհաջողվի կանխել նման սպառնալիքների կրկնությունը»,- հավելեց ԱԺ փոխնախագահը: