Եվ ՌԴ-ի, և Վրաստանի, և Իրանի համար ձեռնտու է, որ Իրան-Վրաստան խողովակաշարն անցնի ՀՀ տարածքով

2015 թ-ին կնքվեց ռուս-հայ-իրան-վրացական էներգետիկ համաձայնագիր, որով այս երկրները առավել ակտիվ կներգրավվեն տարածաշրջանային էներգետիկ ծրագրերում:

Էներգետիկ համատեղ գործունեությունն ավելի որոշակիացավ, երբ Իրանն ու Վրաստանը սկսեցին բանակցել Իրանից Վրաստան գազի մատակարարման շուրջ: Այստեղ խնդիրը մնաց մեկը, թե որ երկրի միջով պետք է անցնի խողովակաշարը` Հայաստանի, թե Ադրբեջանի:

Խնդրի առանչությամբ իրանագետ Վարդան Ոսկանյանը newspress.am-ի հետ զրույցում նշեց, որ վրաց-իրանական բանակցությունները տպավորություն էր, որ տարօրինակ բանակցություններ են և տպավորություն կա, որ Վրաստանի դիրքորոշումը հստակ չէ: Մի կողմից թվում է Վրաստանը փորձ է կատարում դիվերսիֆիկացնել իր գազային կախվածությունը Ադրբեջանից, իսկ Իրանից խողովակաշարն օգտագործելով փորձում է Ադրբեջանից գազային զեղչեր ստանալ. «Կեղծ այլընտրանք առաջարկել, դրա փոխարեն ստանալ Ադրբեջանից առավել շահավետ պայմաններ»:

Իրանագետի խոսքով, քաղաքագիտական դաշտում շատ ավելի կարևոր է, որ եթե Վրաստանի կողմից կա ավելի մեծ ցանկություն դիվերսիֆիկացնել իր գազային կախվածությունը, ապա Իրանի հետ հարաբերությունների պարագայում ամենաօպտիմալ տարբերակը բնականաբար կլինի Հայաստանը:

«Իմաստ չկա դիվերսիֆիկացենլ գազային կախվածությունը Ադրբեջանից, եթե խողովակը կրկին պետք է անցնի այն երկրի տարածքով, որից դու փորձում ես ստանալ զեղչեր»,- ասաց նա:

Ինչ վերաբերում է ռուսական կողմին, ապա Վարդան Ոսկանյանի խոսքով, ՌԴ կողմի դիրքորոշման մեջ ևս փոփոխություն կա, հաշվի առնելով էլէներգիայի քառակողմ ձևաչափը: Ժամանակին Արևմուտքը ռուսական ազդեցության տակից բերելու նպատակով օգտագործեց էներգետիկ ուղիները թուրք-ադրբեջանական առանցքին միացնելով Վրաստանին: Այժմ Ռուսաստանը նույն մեթոդաբանությամբ կարող է Վրաստանին դուրս բերել թուրք-ադրբեջանական էներգետիկ ուղիներից` Ադրբեջան-Թուրքիայի դիմաց առաջարկելով Հյուսիս-Հարավ համագործակցությունը. այն է` խողովակաշարի անցումը հենց ՀՀ տարածքով:

Իրանագետը նաև հիշեցրեց, որ ՌԴ-ի համար շահեկան է Հայաստանի տարածքով խողովակաշարի անցումը, քանի որ Հայաստանը լավ հարաբերություններ ունի թե Իրանի, թե Վրաստանի հետ: Ինչ վերաբերում է Ադրբեջանին, ապա Իրանը Ադրբեջանի հետ ունի և սահմանային, և Կասպից ծովի և այլ խնդիրներ, իսկ Հայաստանը Իրանը դիտարկում է բարեկամ երկիր: