Փաշինյանը գիտեր, որ նախագահներն իր հետ չեն բանավիճելու, նա պետք է տիկ-տոկ բաթլ անի՝ ի՞նչ բանավեճ. դա է իր նեղ մասնագիտական ոլորտը․ Մամիջանյան

Այն, ինչ արել է Փաշինյանը, դրանից հետո նորմալ մարդը պետք է գետինը մտներ, ամոթից գլուխը կախեր, կամ գոնե առնվազն լռեր, բայց դրա փոխարեն նա հակահարձակման է անցնում ու ասում, թե՝ վաղուց հանձնած էր դա։ Այս մասին ասուլիսի ժամանակ հայտարարեց ԱԺ «Պատիվ ունեմ» խմբակցության ղեկավար Հայկ Մամիջանյանը՝ անդրադառանլով Նիկոլի Փաշինյանի հայտարարությանը, որով նա ՀՀ նախկին նախագահներին կանչել է բանավեճի։

«Ինքը հաստատ գիտեր, որ նախագահներն իր հետ չեն բանավիճելու, ընդ որում` նախագահներից յուրաքանչյուրի հայտարարության մեջ նշված են այն պատճառները, որոնցով Փաշինյանի հետ բանավիճելու որևէ տրամաբանություն չկա։ Բանավիճող էր՝ ՀՀԿ փոխնախագահ, քաղբանտարկյալ Արմեն Աշոտյանն արդեբն 4 տարի է՝ բանավեճի հրավեր է անում, վերջերս Արտաքին գործերի նախկին նախարար Վարդան Օսկանյանն է հրավիրել բանավեճի․ եթե նրա նպատակը ժողովրդի իմանալն է՝ ի՞նչ տարբերություն, թե ում հետ ես բանավիճում, վեր կաց, բանավիճիր»,- ասաց Մամիջանյանը։

Նրա դիտարկմամբ, բանավեճի պատմությունը գծագրվել է ՊՈԱԿ-ի և Փաշինյանի թիմակիցների կողմից, ինչպես գծվել են Փաշինյանի ու մյուսների օրվա գրառումները, որոնք, Մամիջանյանի գնահատմամբ, հոխորտալով խոսում են նախկին նախագահների մասին։

«Այդ ամենը գծված սցենար է, որն ունի նաև հաջորդ արարներ։ Ես կարծում եմ, որ հաջորդիվ մի թուղթ է վերցնելու, որը կարող է լինել նաև ադրբեջանական կողմի լոբբիստական նախաձեռնություններից վերցրած մի բան և ցույց տալ, թե՝ այ, տեսեք, այստեղ գրած է, որ Արցախը լինելու էր Ադրբեջանի կազմում։ Այ մոտ էդ մակարդակի արժանահավատության թուղթ է լինելու»,- ասաց Մամիջանյանը՝ հավելելով, որ սա շոու է, որով Փաշինյանը կփորձի քաղաքացիների ուշադրությունը շեղել և խաբել։

«Նիկոլ Փաշինյանը չպետք է բանավիճի, Փաշինյանը պետք է տիկ-տոկ բաթլ անի՝ ի՞նչ բանավեճ. դա է իր նեղ մասնագիտական ոլորտը»,- ընդգծեց Մամիջանյանը։