Ֆիդանը խոսել է Սիրիայից թուրքական զորքերը դուրս բերելու մասին

Թուրքիայի արտգործնախարար Հաքան Ֆիդանը հայտարարել է, որ իր երկիրը Սիրիայում ռազմական ներկայությունը պահպանելու պատճառ չի ունենա, եթե վերանան միգրացիայի և ահաբեկչության հետ կապված սպառնալիքները։

«Ինչպես գիտեք, թուրքական ներկայությունը Սիրիայում ուներ երկու հիմնական նպատակ. դրանցից մեկը Թուրքիա հետագա զանգվածային գաղթի կանխումն է, քանի որ 5 միլիոն մարդ ապրում էր ընդդիմության կողմից վերահսկվող տարածքներում: Մեզ համար կարևոր էին նաև հակաահաբեկչական խնդիրները։ Հիմա, երբ մենք տեսնում ենք, որ այս երկու հիմնական խնդիրները վերացվում են, մենք Սիրիայում մնալու պատճառ չունենք»,- ասել է նա Քաթարյան «Ալ Ջազիրա» հեռուստաալիքին տված հարցազրույցում՝ պատասխանելով այն հարցին, թե հնարավոր է թուրքական զորախումբը դուրս բերել Սիրիայից, եթե Արաբական Հանրապետության անցումային կառավարությունը լիակատար վերահսկողություն է սահմանում երկրի տարածքի վրա։

Ֆիդանի խոսքով՝ Թուրքիան մտադիր է օգտագործել իր ազդեցությունը Սիրիայում՝ սիրիացի ժողովրդին ավելի շատ օգնելու համար։

«Մենք դրան նայում ենք այսպես, քանի որ չենք ցանկանում տեսնել, որ տարածաշրջանի երկրների մոտ տպավորություն ստեղծվի, թե Թուրքիան ինչ-որ կերպ գերիշխում է Սիրիայում»,- հավելել է նա։

«Ոչ մի երկիր իրականում չի կարող լուծել Սիրիայի բոլոր խնդիրները, ուստի մենք պետք է միասին աշխատենք», - շարունակել է Թուրքիայի արտգործնախարարը։