Գարեգին Երկրորդն ընդունել է Շիրակի նորանշանակ մարզպետին

Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսը Մայր Աթոռ Սուրբ Էջմիածնում մարտի 10-ին ընդունել է Շիրակի նորանշանակ մարզպետ Հովսեփ Սիմոնյանին և Շիրակի թեմի առաջնորդ Գերաշնորհ Տեր Միքայել եպիսկոպոս Աջապահյանին: Մայր Աթոռի տեղեկատվական համակարգից հայտնում են, որ հանդիպմանն Ամենայն Հայոց կաթող իկոսը նշանակման առիթով շնորհավորել է մարզպետին և հաջողություններ մաղթել նրա ծառայությանը: Նորին Սրբությունը հավելել է, որ դժվարին առաքելություն է Շիրակի մարզպետ լինելը, քանի որ մարզում տակավին վերացված չեն երկրաշարժի ավերիչ հետևանքները:

Այս կապակցությամբ Ամենայն Հայոց կաթողիկոսը գոհունակությամբ արձանագրել է, որ Միքայել Սրբազանը ևս մասնակից է մարզի բնակչության խնդիրների կարգավորմանն ուղղված սոցիալական ծրագրերին և, իբրև «Գյումրին առանց տնակների» ծրագրի հոգաբարձուների խորհրդի նախագահ, իր աջակցությունն է բերելու Գյումրու կարիքավոր ընտանիքներին: Իր հերթին Հովսեփ Սիմոնյանը վստահություն է հայտնել, որ Մայր Աթոռ Ս. Էջմիածնի և Ամենայն Հայոց Հայրապետի օրհնությամբ ավելի արդյունավետ կերպով կկարողանա կատարել իր պարտականությունները: Նա խոսել է նաև մարզպետարանի և թեմի միջև առկա ջերմ ու գործակցային հարաբերությունների մասին` պատրաստակամություն հայտնելով ըստ ամենայնի զորակցելու Հայ եկեղեցու ազգանպաստ առաքելությանը: Վերջում Նորին Սրբությունը Շիրակի մարզպետին մաղթել է Աստծու օրհնության ներքո փառքով և պատվով իրականացնելու իր ծառայությունը:

Newspress.am-ի հետ զրուցում Գերաշնորհ Տեր Միքայել եպիսկոպոս Աջապահյանը նշեց, որ զրույցի ընթացքում անդրադարձ է կատարվել մարզի սոցիալական խնդիրներին, ինչպես նաև հոգևոր կյանքին ու եկեղեցաշինության ծրագրերին: Նա շեշտեց, որ Շիրակի մարզում հազարավոր խնդիրներ կան. «Ոչ մի մարզպետ հրաշագործ չի, որ կարողանա դրանք ամբողջությամբ լուծել, խնդիրները լուծելու տրամադրվածություն կա, մենք էլ կօգնենք, որքանով կհաջողի նոր մարզպետը ցույց կտա ժամանակը, ինչ տարբերություն դաշնակցական է մարզպետը, թե հանրապետական»,- եզրափակեց Գերաշնորհ Տեր Միքայել եպիսկոպոս Աջապահյանը: