Հանրային իրազեկման, պատրաստվածության և կարողությունների զարգացման միջոցով դիմակայունության բարձրացում. աշխատաժողով Շիրակի մարզում (տեսանյութ)

ՆԳ նախարարությունը «Աղետների դիմակայության օր» հանրային իրազեկման միջոցառումների շրջանակում դեկտեմբերի 11-ին Շիրակի մարզպետարանում անցկացրել է «Դիմակայության բարձրացում՝ հանրային իրազեկման, պատրաստվածության և կարողությունների զարգացման միջոցով» խորագրով աշխատաժողով:

Աշխատաժողովի նպատակը պետական կառավարման և տեղական ինքնակառավարման մարմինների համագործակցության խթանումն էր՝ ուղղված աղետների ժամանակ բնակչության պաշտպանության մեխանիզմների ամրապնդմանը, աղետների ռիսկի կառավարման պլանավորմանը, հանրային իրազեկվածության և ճգնաժամային հաղորդակցման ընթացակարգերի բարելավմանն ու դիմակայունության բարձրացմանը:

Աշխատաժողովին մասնակցում էին ՆԳ նախարարության, Շիրակի մարզպետի աշխատակազմի, հանրակրթական և բարձրագույն ուսումնական հաստատությունների, բժշկական կենտրոնների ներկայացուցիչներ, ինչպես նաև մարզի համայնքների ղեկավարներ և արտակարգ իրավիճակների գծով պատասխանատուներ։

ՆԳ նախարարի մամուլի քարտուղար, ՆԳՆ հանրային հաղորդակցության և իրազեկման վարչության պետ Նարեկ Սարգսյանն անդրադառնալով դիմակայուն հասարակության ձևավորման անհրաժեշտությանը՝ ընդգծել է ոչ միայն բնակչության պատրաստվածությունը, այլև համայնքային մակարդակում կարողությունների և համակարգված աշխատանքի զարգացումը: Այդ համատեքստում նա կարևորել է հանրության տեղեկացվածությունը, աղետներին պատրաստվածության խթանումը, ինչի շնորհիվ կձևավորվի աղետների մարտահրավերները հաղթահարելու ունակ, իրազեկ և դիմակայուն հասարակություն։