Ղարաբաղյան հարցի քննարկման համար կա համապատասխան ֆորմատ և երկու կողմ. (տեսանյութ)

Կառավարությունն այսօր հավանության արժանացրեց «Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետության բնական գազի առաքման ժամանակ գների ձևավորման կարգի վերաբերյալ 2013 թվականի դեկտեմբերի 2-ի համաձայնագրում փոփոխություններ կատարելու մասին» արձանագրության կնքման առաջարկությանը համաձայնություն տալու մասին նախագիծը:

Էներգետիկայի և բնական պաշարների փոխնախարար Իոսիֆ Իսայանն ասաց, որ հայկական կողմը դիմել է Ռուսաստանին առաջարկով, որ ՀՀ-ին մատակարարող գազի գինը վերանայվի:

«Հաշվի առնելով, որ բանակցությունները շարունակվում են, պայմանավորվածություն է ձեռք բերվել պահպանել նույն գինը մինչև 2016 թվականի առաջին եռամսյակ»,-ասաց նա:

Արդեն կառավարության նիստից հետո, լրագրողների հետ զրույցում ՀՀ արտաքին գործերի նախարարի տեղակալ Շավարշ Քոչարյանը նկատեց, որ գազի գինը պահպանվում է, որպեսզի բանակցությունները գնան ավելի արտոնյալ պայմանների շուրջ:

«Ռուսաստանի հետ գազային համաձայնագրում փոփոխություններ կատարելու արձանագրության փոփոխությամբ Հայաստանի Հանրապետությանը մատակարարվող գազի 165 դոլար գինը ֆիքսվել է կարճատև ժամանակահատվածի համար, որպեսզի բանակցություններն ընթանան առավել արտոնյալ պայմանների շուրջ»,-ասաց Շավարշ Քոչարյանը:

Պատասխանելով լրագրողների հարցին և արձագանքելով փորձագետ Ալեքսանդր Խրամչիխինի հնչեցրած վերլուծությանը` Հայաստանի ռազմական պոտենցիալի վերաբերյալ, Շավարշ Քոչարյանը նկատեց, թե այն, ինչ հրապարակվել է արդյո՞ք համապատասխանում է իրականությանը, թե՝ ոչ:

«Իրականում ես կարող եմ ընդհանուր մի բան ասել, չխորանալով թվերի մանրամասների մեջ, որ համենայնդեպս, հնարավոր արկածախնդրության դեպքում հայկական կողմերը միշտ պատրաստ են հակահարված տալու և պատժելու»,- ասաց նա:

Անդրադառնալով Ջեմյս Ուորլիքի Վրաստան կատարած այցին ու նրա Թվիթերյան գրառմանն, ըստ որի Թբլիսիում կքննարկվի ԼՂ կարգավորման հարցը, Շավարշ Քոչարյանը նշեց, որ դա անհնար է, քանի որ Ղարաբաղյան հարցի քննարկման համար կա համապատասխան ֆորմատ և երկու կողմ:

Մանրամասները` տեսանյութում