Կառավարությունը մի կողմից մերժեց Արծվիկ Մինասյանին, մյուս կողմից ֆինանսավորեց նախարարությանը

Կառավարության այսօրվա նիստում ԱԺ պատգամավոր Միքայել Մելքումյանը  ներկայացրեց Եկամտային հարկի մասին ՀՀ օրենքում լրացումներ կատարելու մասին նախագիծը, ըստ որի նախատեսում է, որ ազատ տնտեսական գոտու շահագործող համարվող անհատ ձեռնարկատերերի՝ ազատ տնտեսական գոտու գործողության ընթացքում ստացած եկամուտները եկամտային հարկման առումով համարվեն  նվազեցվող եկամուտներ և չհարկվեն  եկամտային հարկով:  Այս նախագիծն առաջացրեց ֆինանսների նախարարի դժգոհությունը:

Գագիկ Խաչատրյանը կոչ արեց չընդունել նախագիծը, պատճառաբանմամբ, որ ազատ տնտեսական գոտիները ստեղծվում են օտարերկրյա ուղղակի ներդրումների ներգրավմամբ՝ նոր աշխատատեղեր ստեղծելու, արտահանումը և տնտեսական աճը խթանելու նպատակով:

Հետևաբար, անհատ ձեռնարկատերերին ազատ տնտեսական գոտիներում գործունեություն իրականացնելու լրացուցիչ խթանների տրամադրումը չի հանգեցնի օտարերկրյա ուղղակի ներդրումների ներգրավմանը: Ֆինանսների նախարարին ընդդիմացավ  Էկոնոմիկայի նախարար Արծվիկ Մինասյանը` ներկայացվող նախագիծը ներկայացնելով հավասարություն ստեղծելու հիմնավորմամբ:

Սակայն  Գագիկ Խաչատրյանի ներկայացրած տեսակետը արժանացավ թե կառավարության աշխատակազմի ղեկավար-նախարար Դավիթ Հարությունյանի, թե Հովիկ Աբրահամյանի հավանությանը և  Դաշնակցական  նախարարի կողմից պաշտպանվող նախագիծը համարվեց անընդունելի, սակայն վարչապետը փարատեց  Մինասյան Արծվիկի տրտմությունը`Էկոնոմիկայի նախարարությանը  հատկացնելով  150.000 ԱՄՆ  դոլար 2019 թ-ի ՏՏ միջազգային համաժողով կազմակերպելու համար: