«Բարեփոխման» անվան տակ Վահե Ղազարյանի կադրային «ջարդը» ջլատել է համակարգը՝ հեռացնելով պրոֆեսիոնալ կադրերին

NEWSPRESS.am-ի տեղեկություններով, Ներքին գործերի այլևս նախկին նախարար Վահե Ղազարյանը պաշտոնանկությունից առաջ մեծ կադրային տեղաշարժեր է իրականացրել։ Դրա հետևանքով, համակարգի հարյուրավոր պրոֆեսիոնալ աշխատակիցներ մնացել են անգործ:

Քրեական ու համայնքային ոստիկանության ներդրման «բարեփոխման» անվան տակ իրականացրած կադրային «ջարդը» պարզապես ջլատել է համակարգը:

Առհասարակ, Վահե Ղազարյանի կադրային քաղաքականությունը միշտ է անհասկանալի եղել, քանի որ վերջինս կոնկրետ պաշտոններում անձանց նշանակել է ոչ թե մասնագիտական գիտելիքները հաշվի առնելով, այլ զուտ իր սուբյեկտիվ հայեցողությամբ:

Քրեականի աշխատողները, չգիտես ինչու, հաճախ նշանակվել են հասարակական կարգի ապահովման ծառայություններում և ընդհակառակը: Ասում են՝ նա հատկապես «մեծահոգի» է գտնվել , այսպես ասած, ՄՌՈՒ-ների և ՃՈ նախկին աշխատակիցների նկատմամբ: Բոլոր ստորաբաժանումներում նա իր «դեսպաններն» ունի, որոնք աչքի չեն ընկնում ոչ փորձառությամբ, և ոչ էլ՝ գրագիտությամբ: Այդ կադրերը ներկայիս ղեկավարության համար իսկական «ականներ» են:

Մեր տեղեկություններով, Վահե Ղազարյանի կադրային այդ վերադասավորումների պատճառով, համատարած խախտվել է ոստիկանությունում ծառայության մասին օրենսդրությունը․ արդյունքում՝ տասնյակ դատական պրոցեսներ:

Ըստ մեզ հասած լուրերի, ներկայումս բազմաթիվ անձինք մտադիր են տարբեր ատյաններում բողոքարկել իրենց հանդեպ իրականացրած անարդար մոտեցումները: