Դատապարտելի է․ դառնում ենք խոցելի՝ անձնական կյանքը տեղափոխելով «հեռախոս»․ Հակոբ Բադալյանը՝ Աղազարյանի նամակագրությունը հրապարակելու մասին

Քաղաքական վերլուծաբան Հակոբ Բադալյանը տելեգրամի իր ալիքում գրել է․

«Հովիկ Աղազարյանի թեմային անդրադառնում եմ հազվադեպ, ընդ որում դրա ավելի լայն քաղաքական համատեքստի առումով:

Անձնական կյանքի գաղտնիության հանգամանքը իհարկե այս պատմության առանձին կողմն է: Այստեղ, առերեւույթ հանգամանքից զատ, կա իհարկե իրողությունը, որը բացարձակապես պայմանավորված չէ Հովիկ Աղազարյանով կամ որեւէ այլ մեկով:

Հարգելիներս, ձեր անձնական կյանքը ձեր հեռախոս այս կամ այն կերպ «ներբեռնելիս» երբեք մի մոռացեք այն, որ ժամանակակից տեղեկատվա-տեխնոլոգիական միջավայրում այդ հանգամանքը ձեզ դարձնում է բացարձակապես անպաշտպան: Եվ այստեղ որեւէ կերպ լոկ իշխանության հարց չէ: Ժամանակակից տեխնոլոգիաները մեզ դարձրել են անպաշտպան, լինի իշխանության հանդեպ, թե որեւէ մի այլ սրիկայի, կամ հատուկ ծառայության, Հայաստանի, թե այլ երկրի հատուկ ծառայության:

Սրա դեմ, ըստ իս, գործնականում այլեւս չկա լուծում, լինի լավ, թե ատ իշխանություն: Նախ, որեւէ տեղ չկա լավ իշխանություն՝ սա էլ մոռացեք, եւ առավել եւս չկա լավ հատուկ ծառայություն: Երկրորդ, միակ լուծումը անձնական կյանքը հեռախոսից առավելագույնս «դուրս պահելն» է:

Սա բացարձակապես չի արդարացնում այն, որ Հովիկ Աղազարյանի անձնական տվյալները դարձել են նրա հանդեպ որեւէ գործողության միջոց: Դա որեւէ մարդու առումով չի կարող ենթակա լինել որեւէ արդարացման:

Եվ ավելին, դա անխոս դատապարտելի երեւույթ է, ում էլ այն վերաբերի:

Միեւնույն ժամանակ կրկնեմ, ընդգծեմ, որ մենք պարզապես գլոբալ առումով ենք դառնում խոցելի, երբ մեր անձնական կյանքը տեղափոխում ենք «հեռախոս»:

Եվ սա ժամանակակից մարդուն նետված իսկապես լրջագույն մարտահրավեր է:

Սա իհարկե այն լայն քաղաքական համատեքստը չէ, որի մասին խոսեցի վերեւում: Այդ համատեքստի առնչությամբ այսօր քիչ ավելի ուշ կանեմ մի անդրադարձ»։