Գագիկ Ծառուկյանի «ռևանշի» մասին խոսք լինել չի կարող

Հայաստանում, գրեթե միշտ, գործարարները իշխանության դեմ դուրս չեն գալիս, հակազդեցությունը մեծ է:

Թերևս այդ մասին են վկայում նաև անցյալ տարվա փետրվարյան դեպքերը` կապված Բարգավաճ Հայաստան կուսակցության ղեկավար Գագիկ Ծառուկյանի հետ:

Շրջանառվող որոշ լուրերի համաձայն, սակայն, գործարարը փորձում է հավասարվի մյուսներին ու կանգնի նախագահ Սերժ Սարգսյանի կողքին:

Խաչատուր Սուքիասյանին պատկանող նորակառույց «Ռոսիա-Մոլ» առեւտրի կենտրոնի բացման արարողությանն էլ Սերժ Սարգսյանը հատուկ ուշադրության է արժանացրել: Ըստ մամուլի` իրականում ԲՀԿ նախկին նախագահը նոր կուսակցություն է ցանկանում ձևավորել ու մտնել քաղաքականություն, կամ ինչպես ասում են` «ռևանշի» է պատրաստվում:

Քաղտեխնոլոգ Արմեն Բադալյանը, սակայն, newspress.am-ի հետ զրույցում նկատեց, որ դրա իմաստը չի տեսոնւմ:

«Ռևանշ փնտրող մարդն այլ քաղաքականություն կիրականացներ և չէր թողնի, որ գործը հասնի փետրվարյան իրադարձություններին»,-ասաց Բադալյանը:

Նա հիշեցրեց, որ Գագիկ Ծառուկյանը մի քանի անգամ հայտարարել է արդեն, որ իր համար քաղաքականության էջը փակված է: Քաղտեխնոլոգի դիտարկմամբ` այն ժամանակ, երբ ստեղծվեց Բարգավաճ Հայաստանն ու դրա ղեկավարը դարձավ Գագիկ Ծառուկյանը քաղաքական հեռահար նպատակներ կային, իսկ այսօր` փետրվարյան հայտնի դեպքերից հետո նորից քաղաքականություն մտնել ու կուսակցություն ստեղծելը դառնում է անիմաստ:

«Դա չպետք է շփոթել պատգամավոր դառնալու հետ: Հաշվի առնելով այն հանգամանքը, որ հաջորդ տարի խորհրդարանական ընտրությունները լինելու են համամասնական և այդ ընտրություններին մասնակցելու համար պետք է կուսակցություն ձևավորի, բայց այսօրվա դրությամբ մենք չենք տեսնում նրա կուսակցություն ստեղծելու ցանկություններն ու գործողություները: Սա իրականությանը չի համապատասխանում»,-նկատեց Բադալյանը` հավելելով, որ այսօր «նախագահապետությունը» քաղաքական դաշտի վրա ավելի է մեծացել, իսկ Գագիկ Ծառուկյանն էլ քաղաքական դաշնակիցներ չունի այնպես, որ «ռևանշի» մասին խոսք լինել չի կարող: