Եղիշե Չարենցի տանը կցուցադրվի ժամանակակից էրոտիկ արվեստ

Եղիշե Չարենցի տուն-թանգարանի ղեկավար կազմի հովանու ներքո վաղը՝ դեկտեմբերի 6-ին, տեղի կունենա մի ցուցադրություն, որի շրջանակներում պիտի համադրվեն Չարենցի ինտիմ ստեղծագործությունները ժամանակակից արվեստագետների «սեռականությանը և անձնական կրքերի» վերաբերյալ գործերի հետ:

Այս մասին ֆեյսբուքյան իր էջում գրել է չարենցագետ Արա Զարգարյանը։

 

Ցուցադրության մասին տեղեկությունը համացանցից հեռացվել է հենց այն պահին (նոյեմբերի 29), երբ տեղեկացա ցուցադրության մասին և մեծ դժվարությամբ կապ հաստատեցի թանգարանի ղեկավար կազմի հետ՝ պարզելու, թե ինչ նպատակ ունի ցուցադրությունը: Նշեմ, որ ցուցադրության մասին տեղեկությունը մինչև հիմա համացանցում չկա:

 

Դեմ եմ և դատապարտում եմ, որ այս ցուցադրությունը տեղի ունենա առաջին հերթին Եղիշե Չարենցի տանը և ոչ միայն, քանի որ այսկերպ Չարենցի արվեստը ներկայացվում է սխալ և վտանգավոր կերպով, իսկ բանաստեղծը օգտագործվում է որպես «գործիք»:

 

Չարենցի ինտիմ ստեղծագործությունները ժամանակակից արվեստի հետ համադրող, Չարենցից գաղափարազուրկ մարդիկ տեղեկություն չունեն այդ ստեղծագործությունների վերլուծության, գաղափարական ընկալումների, գեղարվեստական մոտեցումների մասին, կարծում եմ, որ չեն էլ ընթերցել որևէ գիտական հոդվածն դրանց վերաբերյալ:

 

Սա փաստում է միջոցառման հեռացված գրառումը, որից մեջբերում եմ. «Չարենցի գործերը, որոնցում սեռականությունը անձնական կրքերի ռոմանտիկ արտահայտությունից զատ, խորհրդանշում է անհատական և հասարակական ազատություններ, մարտահրավեր են հանդիսացել իր ժամանակների պահպանողական մշակութային, սոցիալական համակարգերին` պահպանելով իրենց կարեւորությունը մերօրյա հասարակական միջավայրում, որտեղ անհատական ազատությունները չափազանց զգայուն են»:

 

 

«Սիրելի ընկերներ, սիրով ուզում ենք ձեզ հրավիրել «Մաքուր ու մերկ» ցուցահանդեսի բացմանը, որը տեղի կունենա դեկտեմբերի 6-ին ժամը 18։00-ին Եղիշե Չարենցի տուն թանգարանում (Մաշտոց 17): Այս ցուցահանդեսը ԺԱԻ և ArtNexus-ի հայտարարած «Փոխկապակցում» մրցույթի մասն է։ Մրցույթի նպատակն էր Հայաստանի թանգարանների, համադրողների և արվեստագետների միջև կապերի ստեղծումը՝ համատեղ նախագծերի իրականացման միջոցով։ Կոնցեպտ «Մաքուր ու մերկ» ցուցահանդեսը անդրադառնում է Եղիշե Չարենցի բանաստեղծությունների ժամանակին անտիպ, էրոտիկ հատվածին և մեր օրերում ստեղծագործող արվեստագետների մերկության գեղագիտական ընկալումների շուրջ արված աշխատանքներին, որոնք ուսումնասիրում են մարմնի գեղագիտությունը և մերկության ազատականությունը՝ մերօրյա համատեքստում։

 

Չարենցի գործերը, որոնցում սեռականությունը անձնական կրքերի ռոմանտիկ արտահայտությունից զատ, խորհրդանշում է անհատական և հասարակական ազատություններ, մարտահրավեր են հանդիսացել իր ժամանակների պահպանողական մշակութային, սոցիալական համակարգերին` պահպանելով իրենց կարեւորությունը մերօրյա հասարակական միջավայրում, որտեղ անհատական ազատությունները չափազանց զգայուն են:

Մերկությունը էսթետիկ, գաղափարական և զգացմունքային ազատության մարմնացում դիտարկելու միջոցով` մարմինը դառնում է ազատ խոսքի ու ինքնության խորհրդանիշ:

 

ժամանակակից արվեստագետներից յուրաքանչյուրն յուրովի անդրադառնալով մերկության գեղագիտությանը, մարմնի ազատությանը, հաճախ դիտարկում է դրանք նաեւ սոցիալ-քաղաքական կոնտեքստում, հարաբերվելով դրանց ժամանակակից ընկալումների հետ:

 

Այդ աշխատանքները ուղիղ հարաբերումներ են քաղաքականության, պահպանողական հասարակության հետ: Ցուցահանդեսը հավակնում է ներկայացնելու մերկության և գեղագիտության դերը ժամանակակից արվեստում՝ ընդգծելով նրանց կապը քաղաքական, մշակութային և սոցիալական խնդիրների հետ` մերկությունն ու սեռականությունը դիտարկելով որպես անհատական ազատության և անկաշկանդ բնույթի սիմվոլներ՝ մարմնի և ոգեղենի ներդաշնակության, ազատության արվեստային դրսևորումների միջոցով:

Համադրող` Սիրանուշ Կոստանյան: Արվեստագետներ՝ Նարե Պետրոսյան, Գրիգոր Խաչատրյան, Արման Գրիգորյան, Վեհանուշ Թոփչյան, Ալեք Բայանդուրյան-Լևասգանի: Ցուցահանդեսը բաց կլինի մինչև 2025 թվականի փետրվարի 1-ը։

 

Ծրագիրն իրականացվում է Շվեդական միջազգային զարգացման համագործակցության գործակալության (Sida) կողմից ֆինանսավորվող և Շվեդիայի Արվեստի դրամաշնորհների կոմիտեի կողմից իրականացվող ArtNexus ծրագրի օժանդակությամբ»: