Իրականում 2016 թ.-ից բարձրաստիճան պաշտոնյաների, այդ թվում՝ ԱԺ նախագահի գործուղումների ծախսերը պետական գաղտնիք են. Civilnet

Civilnet. Ալեն Սիմոնյանը պնդում է՝ պաշտոնյաների գործուղումների ծախսերը թափանցիկ են։ Իրականում 2016թ.-ից բարձրաստիճան պաշտոնյաների, այդ թվում՝ ԱԺ նախագահի գործուղումների ծախսերը պետական գաղտնիք են։ 2018թ.-ից հետո էլ այդ ծախսերը բացելու նախաձեռնությունը մերժվել է իշխող ուժի կողմից։

Ազգային ժողովի նախագահ Ալեն Սիմոնյանը դեկտեմբերի 4-ին լրագրողների հետ ճեպազրույցում հայտարարել է, թե արտերկրյա գործուղումների բոլոր ծախսերը թափանցիկ հրապարակվում են և որևէ բան չի թաքցվում։

Լրագրողների հարցին, թե ինչու են արտերկրյա գործուղումների մեկնող պատվիրակություններն այդքան մեծաթիվ, Սիմոնյանը պատասխանել է, որ դրանք համապատասխանում են աշխատանքային պահանջներին։ Նա նաև բացատրել է բիզնես դասի ավիատոմսերի անհրաժեշտությունը՝ նշելով, որ երկար թռիչքներից հետո անմիջապես պետք է մասնակցի բարձրաստիճան հանդիպումների։

«Ինձ, առնվազն իմ պարագայում, պետք է, որ ես քնեմ [ինքնաթիռում՝ խմբ.], որ կարողանամ գիտակցեմ անգլերեն, ռուսերեն, հայերեն ինչ եմ խոսում, և որևիցե ծախս փակ չի և որևիցե ծախսի մասին մենք որևիցե բան երբեք չենք թաքցնում»,- ասել է Սիմոնյանը։

ԱԺ նախագահի պնդումը ծախսերի թափանցիկության վերաբերյալ մոլորեցնող է

2017-ից ի վեր ՀՀ նախագահի, վարչապետի և Ազգային ժողովի նախագահի արարողակարգային ծախսերը, այդ թվում՝ գործուղումների, տրանսպորտային սպասարկման, կեցության և սննդի հետ կապված ծախսերը, համարվում են պետական գաղտնիք և չեն հրապարակվում։

Այս կարգավորումը սահմանվել է 2016-ի դեկտեմբերի 16-ին՝ «Գնումների մասին» օրենքում կատարված փոփոխությունների արդյունքում։ Չնայած 2018-ին տեղի ունեցած իշխանափոխությանը՝ օրենքը շարունակում է գործել, և բարձրաստիճան պաշտոնյաների արարողակարգային ծախսերը մնում են փակ հանրության համար։

2019-ին «Լուսավոր Հայաստան» խմբակցության օրենսդրական նախաձեռնությունը՝ թափանցիկ դարձնելու բարձրաստիճան պաշտոնյաների ծախսերը, մերժեց նախ Նիկոլ Փաշինյանի գլխավորած կառավարությունը, այնուհետև նաև խորհրդարանական իշխող «Իմ քայլը» խմբակցությունը։

Նախագծով առաջարկվում էր «Գնումների մասին» օրենքում փոփոխությունների միջոցով բարձրացնել իշխանությունների՝ հասարակության նկատմամբ հաշվետվողականությունը և հրապարակել հատուկ պետական պաշտպանության ենթակա անձանց ծախսերի վերաբերյալ հաշվետվությունները։

Վարչապետ Փաշինյանը, խեղաթյուրելով նախագծի էությունը, այն ներկայացրեց որպես ահաբեկչական ռիսկ պարունակող փաստաթուղթ, որը կբացահայտի պաշտոնյաների անվտանգության մանրամասներ։ Այնինչ իրականում նախագիծը վերաբերում էր միայն արդեն կատարված ծախսերի հրապարակմանը։

2024-ի մարտին Եվրոպայի խորհրդի կոռուպցիայի դեմ պայքարող պետությունների խումբը՝ GRECO-ն, հատուկ առաջարկ է ներկայացրել Հայաստանին՝ կոչ անելով վերանայել վարչապետի, նախագահի և ԱԺ նախագահի արարողակարգային ծախսերի փակ գործընթացը։

«GRECO-ն առաջարկում է վերանայել վարչապետի, նախագահի, ԱԺ նախագահի արարողակարգային ծախսերի հետ կապված պետական գնումների գործող փակ գործընթացները՝ նպատակ ունենալով սահմանափակել դրանց օգտագործումը բացառապես այն դեպքերում, երբ դրանք բավականաչափ հիմնավորված են ազգային անվտանգության նկատառումներով»,- նշված է զեկույցի կետերից մեկում, որին Հայաստանի իշխանությունները հրապարակային չեն արձագանքել և օրենքի նոր նախագծեր չեն բերվել։

Նյութն ամբողջությամբ՝ սկզբնաղբյուր կայքում: