Վահե Ղազարյանի «գոլդացումը»

Երբ 2018 թվականից հետո գավառական միջակ միլիցիոներ Վահե Ղազարյանը իշախանության եկած դասընկերոջ շնորհիվ հայտնվեց մայրաքաղաքում ու մտավ մարդամեջ, նա Երևանում բնակվում էր «Գլենդել հիլզ» թաղամասի մի անշուք բնակարանում:

Չորս տարվա ընթացքում, Գետահովիտի թաղայինի հավակնող այս անձը զբաղեցրեց հանրապետության ուժային կառույցի ամենաբարձր պաշտոնները` ոստիկանության զորքերի հրամանատար, ոստիկանության պետ ու ՆԳ նախարար: Նրա պաշտոնավարումը հասարակության շրջանում թերևս կհիշվի Եռաբլուրում զոհվածների ծնողների դեմ ամոթալի բռնությամբ, խաղաղ ցուցարարների դեմ հատուկ միջոցներ կիրառելու դեպքերով, հարյուրավոր անձանց նկատմամբ ոստիկանական բռնություններով և այլն:

Սակայն ինքը՝ Ռոբերտի տղա Վահեն, այս չորս տարին կհիշի երանությամբ. «Գլենդել հիլզի» բնակարանը նրան շատ կարճ ժամանակում այլևս նեղ թվաց և հանրապետության ուժային հսկա կառույցի ղեկավարը, NEWSPRESS.am-ի տեղեկություններով, մի քանի տարում դարձավ մի քանի շքեղ նորակառույցների տեր:

Հիմա նրա ընտանիքին հաճախ են տեսնում Նորքի բարձունքի էլիտար շենքում: Որդին, հարսանիքից անմիջապես հետո, Էրեբունի համայնքի մոլերից մեկի հարևանությամբ նորակառույցի բնակարանատեր դարձավ և այդ համայնքի օդիոզ դեմքերից մեկի «մեծահոգության» շնորհիվ, ևս մի քանի բնակարանի տեր մայրաքաղաքում. դրանք հիմնականում փաստաթղթավորված են փոխկապակցված անձանց անուններով:

Գյուղից քաղաք եկած այս նախկին պաշտոնյան ևս մի թուլություն ունի. նա «գոլդ» թվերի ու համարների սիրահար է:

Կես միլիոնով ԶԻԼ է գնել, որ 8 միլիոնանոց համարանիշը ձեռքից բաց չթողնի. բեռնատարը գրանցված է 01II001 համարանիշով: Ու միայն մեքենաների համարանիշերի հարցում չէ նա բծախնդիր։ Բնակարանի համարներն էլ ոչ պակաս գոլդ են` 123 և այլն:

Հիմա պաշտոնազրկված Ղազարյանն ակտիվ հետևում է անցած 4 տարում ձևավորած բիզնեսների աշխատանքին. Ծաղկաձորում՝ հսկա շինություն, հայրենի մարզում՝ ռեստորանային և հյուրանոցային բիզնես, շինանյութի խոշոր մատակարար, մարզի փայտանյութի արտադրության թիվ մեկ անձ:

Մեր տեղեկություններով, Տավուշի անտառներում մեծ քանակությամբ ծառեր են հատվում բացառապես նրա արտադրամասերի համար: Այս ամենի մասին, բնականաբար, տեղեկացված է նրա 37 տարվա ընկեր ու դասընկեր ՀՀ վարչապետը։ Եվ ամեն օր նախկինների կոռուպցիայից բարձրաձայնող Փաշինյանը պարզ չէ, արդյոք կանդրադառնա՞ իր ստվերում հարստացած Ղազարյանի ապօրինի հարստացմանը:

Մնում է հուսալ, որ եթե նա չհասցնի կամ չցանկանա հասցնել, ապա գոնե հաջորդ իշխանությունն անպայման գնահատական կտա այդ 4 տարվա տխրահռչակ պաշտոնավարմանը:

NEWSPRESS.am