Գողացել են «Թել-Սել» վճարային տերմինալը, տարբեր տեսակի ծխախոտներ և դրամարկղի գումարը

Shamshyan.com-ի տեղեկություններով, ոստիկանությունում տեղեկություններ են ստացվել, որ անհայտ անձը կամ անձինք թալանել են Լուսառատ գյուղում գործող մթերային խանութներից մեկը և կոտրել են «Իզի Փեյ» վճարային տերմինալը՝ հափշտակելով գումար։

Պարզվել է, որ Ռ․ Մ․-ն, Տ․ Մ․-ն և ոմն Գ․-ն Արագածոտնի մարզի Նոր Եդեսիա գյուղում գտնվող խանութից նույնպես կատարել են գողություն։ Գողացել են «Թել-Սել» վճարային տերմինալը, տարբեր տեսակի ծխախոտներ և դրամարկղի գումարը։

Տուժած քաղաքացիները ֆոտոլրագրողի հետ զրույցում ասել են․ «Կինո էր։ Ամսի 24-ին առավոտ մտանք, որ խանութը բացենք ու սկսենք մեր ամենօրյա քրտնաջան աշխատանքը, բայց մնացինք ապշած, երբ տեսանք, որ խանութի երկաթե ճաղավանդակը պոկված է, եվրոպատուհանն էլ բաց։ Խանութի դուռը բացեցինք, տեսանք «Իզի Փեյ» տերմինալը վնասված է և կոտրած։

Էլ ներս չմտանք, մինչև զանգեցինք ոստիկանության Վեդիի բաժին՝ ոստիկանները արդեն ճանապարհին էին։ Թե որտեղից էին իմացել, որ խանութը թալանել են, դա երևի մեզ չասեն։ Էկան, նայեցին, հետո փորձագետը եկավ, քննիչը եկավ ու գնացին։ Անկեղծ ասած՝ ոչ մի հույս էլ չունեինք, որ կբացահայտեն, կբռնեն էդ թալանչիներին։ Բայց այսօր իմացանք, որ դրանց բռնել են, ճիշտն ասած, էլի չհավատացինք։ Բայց որ ասեցին՝ «BMW»-ով են եղել, հավատացինք։

Էն մյուս խանութի կամեռան էդ ամենը ֆիքսել էր, նաև՝ «BMW»-ն։ Հիմա ուրախ ենք, որ գոնե տականքներին բռնեցին։ Ախր հարամ հացը չի ուտվի, ոնցա կուլ գնալու, ինչ խղճով եք քայլելու փողոցում, երբ գիտեք, քրտինքով ապրող մարդկանց եք թալանում։ Էլի գոհ ենք, որ ոստիկանները բռնեցին, բայց մնում է մեր վնասը փոխհատուցվի, դրանք էլ արժանի պատժի ենթարկվեն, որ մյուսներին դաս լինի»։