ԸՕ-ն երկրում առկա ճգնաժամի լուծման ուղղությամբ հետքայլ է

Ընտրական ցուցակների հրապարակման մասին խոսելիս ԱԺ փոխխոսնակ Էդուարդ Շարմազանովը ասել է, որ իրենք ոչ մի բան չեն մերժում, ինչ-որ իրավական առումով թույլատրելի է, պատրաստ են քննարկել: Նա միևնույն ժամանակ շեշտել է, որ իշխանությունը իրավունք չունի խախտել սահմանադրական դատարանի վճիռը: Ըստ երևույթի` փոխխոսնակը նկատի է ունցել ՍԴ-ի 2003թ-ին ընդունած որոշումը, ըստ որի, քվեարկության մասնակցածների կողմից ստորագրված ցուցակները համարվում են գաղտնի:

Newspress.am-ի հետ զրույցում Ժառանգություն կուսակցության փոխնախագահ Արմեն Մարտիրոսյանը նշեց, որ ՍԴ-ն հակասահմանադրական էր ճանաչել նաև Կուտակային կենսաթոշակների մասին օրենքը, իշխանությունը ընդամենը մի փոքր փոփոխություն արեց, ապա այն կիրառվեց:

Նա նաև նշեց, որ այլ երկրներում ևս ընտրացուցակները հրապարակվում են, մասնավորապես Ամերկայի որոշ նահանգներում, Բելգիայում, Հունաստանում անգամ մասնակցության անձնագիր կա: Արմեն Մարտիրոսյանի դիտարկմամբ` ՀՀ ընտրական օրենսգիրքը պետք է ներկայացվի միջազգային ձևաչափով`ազատ, արդար և թափանցիկ ընտրություններ ունենալու ձևաչափով: Նա հիշեցրեց, թե Ժառանգությունը ինչ կետեր է առաջարկում ներառել. «Քվեարկած քաղաքացիների ցուցակների հրապարակում, մեկ ամիս առաջ ՀՀ-ից բացակայող քաղաքացիների ցուցակների հրապարակում, մատնահետքերով էլեկտրոնային քվեարկություն, առցանց տեսանկարահանում, համամասնական պարզ և առանց վարկանիշային համակարգի ընտրություն, բողոքարկումների և ժամկետների երկարացում, ընտրություններում 3 տոկոս հավաքած կուսակցությունների ծախսերի փոխհատուցում՝ պետական հովանավորչությամբ»:

Նա ընդգծեց, որ Ընտրական օրենսգրքի ներկայացված տարբերակն ամբողջովին անընդունելի է. «Այն Հայաստանի ժողովրդավարության զարգացման, երկրում առկա ճգնաժամի լուծման ուղղությամբ հետքայլ է»: