Կոչերով ու կոշտ հայտարարություններով խնդիրները լուծում չեն ստանում

Վերջին շրջանում Երևանի քաղաքապետ Տարոն Մարգարյանի որոշումներն ու քայլերը անկանխատեսելի են դարձել:

Տարոն Մարգարյանը վերջին օրերին գրեթե փորձել էր համոզել, որ իր քաղաքի ու քաղաքացիների հետ կապված խնդիրներում այլևս «ակնկալում է կոշտ և հետևողական մոտեցում»:

Ավելին, քաղաքապետը հորդորում ու կոչ էր անում իր աշխատակիցներին, թե «փոխե՛ք ձեր աշխատաոճը»:

Շատերն իրո՛ք ուզում էին հավատալ, որ քաղաքապետը վերջապես ձեռքը սեղանին է խփում: Ու մինչ մեկը մյուսին հարցնում էր, թե «այս ինչ է փորձում անել քաղաքապետը», պատասխանն իրեն ուշացնել չտվեց. ոչինիչ չի փոխվել ու չէր կարող փոխվել:

Ավելին` քաղաքապետի, կոշտ  հայտարարություններին հաջորդեց գործնական քայլը. պարզվում է քաղաքապետարանի նախաձեռնած բարի ավանդույթը `մարտի 8-ից ապրիլի 7-ն իրականացվող «Ձեզ համար, կանայք» բարեգործական ակցիան այս տարի չի կայանա:

Նկատենք, որ այս ակցիայի շրջանակներում մայրաքաղաքի կանանց համար բուժհիմնարկներում հայտարարվում էր բաց դռների օր: Կանայք հնարավորություն էին ունենում անվճար բուժօգնություն ստանալ:

Սակայն, այս տարի քաղաքապետարանից տեղեկացրել են, թե ակցիան անվճար է քաղաքացու, բայց ոչ բյուջեյի համար: Ասել է թե բյուջեն թույլ չի տալիս կանանց բուժօգնություն ցուցաբերելու համար «շռայլություններ» թույլ տալ, այն դեպքում, երբ իրականում շռայլություն պահանջող շատ ու շատ  ծրագրերի համար  քաղաքապետարանը գումարները չի հաշվում:

Հիշենք թեկուզ հենց անցյալ տարվա հոկտեմբերը, երբ ֆեյսբուքյան մի խումբ օգտատերեր հանդես եկան նախաձեռնությամբ` պահանջելով չեղյալ հայտարարել Էրեբունի-Երեւանի տոնական միջոցառումները եւ դրանց համար նախատեսված գումարն ուղղել սահմանամերձ գյուղերին, որոնք պարբերաբար հայտնվում են  ադրբեջանական գնդակոծության տակ:

Այդ ժամանակ ևս քաղաքապետն աչքի չընկավ իր նախաձեռնողականությամբ ու, չնայած հազարավոր քաղաքացիների կոչերին ու հորդորներին,  հայտարարեց, թե Երևանի  տոնը մեծ շուքով պետք է նշվի:

Մինդեռ միայն կոչերով ու կոշտ հայտարարություններով,  մեկ մեկ էլ ձեռքը սեղանին խփելով` խնդիրները լուծում չեն ստանում: