Սերժ և Ռիտա Սարգսյանների ունեցվածքը

Սերժ Սարգսյանը Բարձրաստիճան պաշտոնատար անձանց էթիկայի հանձնաժողով է ներկայացրել 2015 թվականի իր եկամուտների եւ ունեցվածքի հայտարարագիրը, ըստ որի Սերժ Սարգսյանը 2015 թվականին 107 միլիոն 998 հազար 657 դրամի փոխառություն է տվել:

Սերժ Սարգսյանի դրամական միջոցները նախորդ տարի կազմել են 6 միլիոն 100 հազար դրամ, որը հարկային տարվա վերջում դարձել է 14 միլիոն 700 հազար դրամ:

Սերժ Սարգսյանի եկամուտները նախորդ տարի կազմել են 28 միլիոն 850 հազար 480 դրամ, որից մի մասը գոյացել է բացառապես աշխատավարձից, իսկ մյուս մասը` 13 միլիոն 835 հազար 515 դրամը, գոյացել է փոխառությամբ տրամադրած գումարի դիմաց ստացած տոկոսներից:

Սերժ Սարգսյանը ունի բազմաբնակարան շենքում մեկ բնակարան եւ մեկ MITSUBISHI MONTERO-SPORT 3.5 I տեսակի ավտոմեքենա:

Ինչպես Սերժ Սարգսյանը, այնպես էլ նրա կինը` Ռիտա Սարգսյանը, փոխառությամբ տրամադրած գումարներից տոկոսներ է ստացել: Ռիտա Սարգսյանի`նախորդ տարիների ներկայացրած հայտարարգրերից տեղեկանում ենք, որ նա 95 միլիոն դրամի փոխառություն է տվել, իսկ 2015 թվականին 12 միլիոն 102 հազար 349 դրամի եկամուտ է ստացել փոխառությամբ տրամադրած գումարից: Ռիտա Սարգսյանի 2015 հայտարարագրից էլ տեղեկանում ենք, որ նա ունի ընդամենը 15 միլիոն 208 հազար դրամ, որը հարկային տարվա սկզբում եղել է 12 միլիոն 340 հազար դրամ: