Հսկիչ գնմամբ ձեռքբերված ապրանքները երբ և ինչ պայմաններով են վերադարձվում. նոր փոփոխություն

Կառավարությունն իր այսօրվա՝ նոյեմբերի 28-ի նիստում որոշում կայացրեց, որի նպատակը հսկիչ գնմամբ ձեռքբերված ապրանքների վերադարձման կարգը և ժամկետները հաստատելն է:

Ըստ գործող կարգի, հսկիչ գնմամբ ձեռք բերված և չվերադարձված ապրանքները հարկային մարմինը դրանք ստանալու օրվան հաջորդող երեսուն աշխատանքային օրվա ընթացքում հանձնում է ՀՀ աշխատանքի և սոցիալական հարցերի նախարարության տնօրինմանը:

Խնդիրն այն է, որ որոշ ապրանքների դեպքում, ինչպիսիք են ալկոհոլային խմիչքները, դեղորայքը, կենդանիների կերերը, հատկապես՝ էկզոտիկ կենդանիների համար նախատեսված կերերը, բջջային հեռախոսները, զարդերը ՀՀ աշխատանքի և սոցիալական հարցերի նախարարությունը այդ ապրանքները օգտագործման նպատակով բաշխելու հնարավորություն կամ իրավասություն չունի։

Այս որոշմամբ առաջարկվում է սահմանել, որ հսկիչ գնմամբ ձեռք բերված և չվերադարձված ապրանքները հարկային մարմինը դրանք ստանալու օրվան հաջորդող երեսուն աշխատանքային օրվա ընթացքում հանձնում է ՀՀ ՏԿԵ նախարարության տնօրինմանը։

Առաջարկվում է նաև .

-              հարկ վճարողին են վերադարձվում հսկիչ գնմամբ ձեռք բերված ապրանքը, պայմանով, որ գնումից հետո չեն փոփոխվել դրանց ապրանքային տեսքը և սպառողական հատկանիշները,

-              վաճառված ապրանքի հետ ընդունման համար կազմվող ապրանքների հետ ընդունման ակտը ստորագրում են հարկ վճարողը, հսկիչ գնում կատարած անձը և հարկ վճարողի անունից ապրանքներ մատակարարող և (կամ) դրամական հաշվարկ կատարող աշխատողը:

Հսկիչ գնմամբ ձեռք բերված ապրանքների վերադարձը կատարվում է հետևյալ ժամկետներում.

1) մասնավորապես՝ դեղերի, հատկապես արագ փչացող սննդամթերքի, կենդանիների, կենդանական ծագում ունեցող մթերքի վերադարձը կատարվում է անմիջապես հսկիչ գնման ժամանակ` հանձնարարագիրը ներկայացնելու պահին.

2) պիտանիության ժամկետ ունեցող ապրանքների վերադարձը կատարվում է մինչև թեմատիկ հարկային ստուգման ավարտը, բայց ոչ ուշ, քան ապրանքների պիտանիության համար սահմանված վերջնաժամկետից տասը օր առաջ կամ անմիջապես, եթե ապրանքների պիտանիության ժամկետը պակաս է տասը օրից.

3) հսկիչ գնում կատարելու պահին սննդամթերքի, սննդամթերքի հետ շփվող նյութերի և սննդային հավելումների ներմուծման, արտահանման, արտադրության, մշակման, վերամշակման, փաթեթավորման, մակնշման, փոխադրման, պահման, իրացման փուլերում անվտանգության համար օրենքով սահմանված պահանջները չբավարարող ապրանքների վերադարձը կատարվում է մինչև թեմատիկ հարկային ստուգման ավարտը։