Դատական նիստերից հետո էլ «Գոյ»-ի դերասանները շարունակում են նստացույցը

Վարչական դատարանում  նոյեմբերի 25-ին և 26-ին տեղի է ունեցել  «Գոյ» թատրոնի՝ Գ. Սունդուկյանի անվան ազգային ակադեմիական թատրոնին միավորելու հարցով դատական նիստ, սակայն որևէ հարց լուծում չի ստացել և թատրոնի անձնակազմը շարունակում է նստացույցը թատրոնի մուտքի մոտ։

Նոյեմբերի 25-ին նիստին «Գոյ» թատրոնի շահերի ներկայացուցիչը ներկայացրել էր  դատավորին ինքնաբացարկի միջնորդություն՝ նշելով, որ դեմ են գործը քննի դատավոր Լիլիթ Սադոյանը։
Նոյեմբերի 26-ին կայացած նիստում դատարանը մերժել է ինքնաբացարկի միջնորդությունը, իսկ պատասխանող կողմը չէր ներկայացել դատարան։ Նիստը հետաձգվել է։

«Գոյ» թատրոնի շահերի ներկայացուցիչ Կարո Ասատրյանը նիստից հետո ասել էր. «Պարտավոր էին ներկայանալ։ Նիստին չներկայանալը նաև որոշակի տեսանկյունից  խոչընդոտ է հանդիսանում»։ 

Հիշեցնենք, որ  կառավարության որոշմամբ «Գոյ» թատրոնը միավորվել է Գ. Սունդուկյանի անվան ազգային ակադեմիական թատրոնին, սակայն «Գոյ» թատրոնի դերասանական ու ստեղծագործական կազմը դեմ է այդ միավորմանը, իրենք ուզում են որպես առանձին թատրոն հանդես գալ, չեն ուզում գնալ ու աշխատել Սունդուկյանի անվան ակադեմիական թատրոնում։ «Գոյ» թատրոնը դատական կարգով վիճակում է կառավարության՝ Գոյ» թատրոնը Գ. Սունդուկյանի անվան ազգային ակադեմիական թատրոնին միավորելու որոշումը։ Չնայած վիճարկվող որոշմանը, հունվարի 30-ից թատրոնները համարվում են միավորված։ 

Նոյեմբերի 7-ից «Գոյ» թատրոնի դերասանները նստացույց են անում։ Նրանց պահանջն է՝ «ԿԳՄՍ Նախարարությունից պահանջում ենք` միջանկյալ հրատապ լուծում. «Գոյ» թատրոնի աշխատանքների վերսկսումը մինչև դատարանի և իրավապահ մարմինների կողմից հարցի վերջնական լուծումը»։