«Մաշա, մենք չենք մեկնաբանում «Южмаш»-ի վրա բալիստիկ հրթիռային հարձակումը»․ Զախարովային զանգել են ճեպազրույցի ժամանակ (տեսանյութ)

Ճեպազրույցի ժամանակ ՌԴ ԱԳՆ պաշտոնական ներկայացուցիչ Մարիա Զախարովան զանգ է ստացել և նրան արգելել են մեկնաբանել ռուսական բալիստիկ հրթիռի հարվածի մասին հաղորդագրությունները։

Երբ Զախարովան պատասխանել է զանգին, բարձրախոսը միացած է եղել և ներկա լրագրողները, ինչպես նաև ԱԳՆ կայքի ուղիղ եթերում բրիֆինգին հետևող բոլորը լսել են խոսակցությունը։

«Մաշա, մենք չենք մեկնաբանում «Южмаш»-ի վրա բալիստիկ հրթիռային հարձակումը, որի մասին սկսեցին խոսել արևմտյան լրատվամիջոցները»,- ասել է տղամարդու ձայնը։

Զախարովան ասել է, որ զանգը «փորձագետների պատասխանն է»։

«Մինչ ճեպազրույցը համացանցում հակասական նյութերի հետ կապված հարցեր կային։ Մասնագետներին հարցրի՝ սա մեր թեմա՞ն են։ Պատասխանը տրվեց ճեպազրույցի ժամանակ՝ ԱԳՆ-ն չի մեկնաբանում։ Այնպես որ, ինտրիգ չկա»,- ՏԱՍՍ-ին ասել է Զախարովան։

Ուկրաինայի ռազմաօդային ուժերը պնդում են, որ նոյեմբերի 21-ի առավոտյան ռուսական զորքերը միջմայրցամաքային բալիստիկ հրթիռ են արձակել Ուկրաինայի ուղղությամբ։ Ուկրաինայի զինված ուժերի հայտարարության մեջ, ինչպես նաև Դնեպրոպետրովսկի շրջանի և Դնեպրի վարչակազմի հաղորդագրություններում չի նշվում, թե որ օբյեկտներն են խոցվել։ Ուկրաինայի նախագահի գրասենյակի նախկին խորհրդական Ալեքսեյ Արեստովիչը հայտնել է, որ հրթիռն արձակվել է «Южмаш» ձեռնարկության ուղղությամբ։