Խանգարում էր նախարարական լիազորությունների՞ բացակայությունը, թե՞ հենց կոնկրետ նախարարը․ վերլուծաբան

Քաղաքական վերլուծաբան Հակոբ Բադալյանը տելեգրամի իր ալիքում գրել է․

Փաշինյանը հայտնել է, որ ներքին գործերի նախարար կնշանակվի Արփինե Սարգսյանը, որը ներկայումս նախարարի տեղակալ է:

Ի՞նչ է հնարավոր ասել այս նշանակման առնչությամբ: Ինչպիսի՞ փոխնախարար է Արփինե Սարգսյանը, դժվար է ասել, բայց, եթե հաշվի առնենք այն, որ նա այսպես ասած ռեֆորմների «առաջնագծում» էր, նրա գործունեության արդյունքը տպավորիչ չէ: Դրա մեղավորը այն էր, որ նա ոչ թե նախարար էր, այլ փոխնախարա՞ր: Այսինքն, խանգարում էր նախարարական լիազորությունների՞ բացակայությունը, թե՞ հենց կոնկրետ նախարարը:

Եթե Արփինե Սարգսյանը փոխնախարարից դառնա նախարար, կփոխվի՞ ռեֆորմների որակ: Ինքս՝ կասկածում եմ: Կասկածում եմ բոլորովին ոչ Արփինե Սարգսյանի կոմպետենտության հանդեպ կասկածով: Նրա զուտ մասնագիտական, «ռեֆորմիստական» կոմպետենտության վերաբերյալ կարծիք հայտնելու բավարար հիմք չունեմ: Նա կարող է լինել կոմպետենտ, բայց մի շարք սուբյեկտիվ իշխանական հանգամանքների պատճառով գործել անարդյունավետ:

Բայց, այդ դեպքում արդյո՞ք նախարարի պաշտոնը կփոխի պատկերը, կվերացնի բոլոր հանգամանքները: Կասկածում եմ, որովհետեւ ըստ իս, ներկայիս կառավարող մեծամասնությանը պետք չէ ռեֆորմացված ոստիկանություն: Ներկայիս մեծամասնությանը, եւ մասնավորապես վարչապետ Փաշինյանին պետք է առավելագույն քաղաքական ենթակայություն ունեցող ոստիկանական, ներքին գործերի համակարգ: Հանրային խիստ ցածր վարկանիշ եւ արտաքին շատ բարդ մարտահրավերներ ունեցող քաղաքական իշխանությանը պետք է հենց այդպիսի ներքին գործերի համակարգ:

Ըստ իս, Արփինե Սարգսյանի նշանակումը պայմանավորված է հենց այդ, այլ ոչ թե ռեֆորմացիայի նկատառումով: Արփինե Սարգսյանն այդ ըստ էության սուպերնախարարության համակարգում իրեն պահելու համար ամբողջությամբ ապավինելու ու ենթակա է լինելու Նիկոլ Փաշինյանին:

Կասեք, իսկ ինչո՞վ ենթակա չէր, ինչո՞վ էր ընդվզում Վահե Ղազարյանը: Սա շատ նուրբ հարց է, որի վերաբերյալ կփորձեմ խոսել առանձին: Միայն ասեմ, որ, հարցն այն չէ՝ Վահե Ղազարյանն ընդվզում էր, թե՞ ոչ: Հարցն այն է, որ նա ԿԱՐՈՂ էր ընդվզել, մի շարք գործոնների ու հանգամանքների բերումով:

Արփինե Սարգսյանի նշանակման մյուս էական մոտիվը, ըստ իս, արեւմտյան դոնորներն են: Ակնառու էր, որ նա «լեզու գտել» էր նրանց հետ: Իսկ դա այժմ Նիկոլ Փաշինյանի կառավարության համար բավականին կարեւոր հարց է՝ լրացուցիչ ֆինանսների, առավել եւս դրամաշնորհային փողերի ներգրավում, երբ կա պետական բյուջեի թերակատարում եւ պետական պարտքի աճ:

Սարգսյանի նշանակումն իհարկե կգոհացնի դոնորներին:

Եվ վերջինը, այս գրառման շրջանակում: Արփինե Սարգսյանը նշանակվել է քաղաքական բարձր պաշտոնի: Նա, ի տարբերություն Վահե Ղազարյանի, ունի հանրային սահուն ու գրագետ խոսքի կարողություն, հետեւաբար կարող է լինել հանրային քաղաքական դեմք: Արփինե Սարգսյանի նշանակումն այդ իմաստով ունի նաեւ «քաղաքական թիմի դեմք փոխելու» նկատառում: