Կրակոցներ՝ Երևանում. տղամարդը ոչ սթափ վիճակում մտել է հորաքրոջ տուն, հայհոյել նրան, սպառնացել է սպանել

Նոյեմբերի 8-ին արտակարգ դեպք է տեղի ունեցել Երևանում։ Ժամը 13։40-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության ոստիկանության Էրեբունու բաժին է զանգահարել Երևանի բնակիչ 46-ամյա Գ․ Խ․-ն և հայտնել, որ իր քեռու որդին հարձակվել է իր ընտանիքի վրա: Րոպեներ անց էլ զանգահարել է Երևանի բնակիչ 37-ամյա Ա․ Ս․-ն և հայտնել, որ այս պահին ավտոշուկայի խաչմերուկում անհայտ անձն ատրճանակով կրակում է իր վրա, խնդրում է ոստիկաններ մոտենան, հաղորդում է Shamshyan.com-ը:

Արդեն տեղում Գ․ Խ․-ն ոստիկաններին հայտնել է, որ նույն օրը ժամը 13։30-ի սահմաններում իր քեռու որդի Ա․ Ս․-ն ոչ սթափ վիճակում իրենց կամքին հակառակ մտել է իր տուն, իր մոր հասցեին  տվել է սպանության սպառնալիքներ և հայհոյանքներ, որից հետո ինքն Ա․ Ս․-ին վախեցնելու և դուրս հանելու նպատակով իրեն պատկանող «Սմիթ և Վեսսոն» տեսակի ատրճանակով մի քանի անգամ կրակել է օդ:

Ոստիկանության Էրեբունու բաժնի ծառայողների կողմից Ա․ Ս․-ն ձերբակալվել և տեղափոխվել է ոստիկանության Էրեբունու բաժին։

Դեպքի փաստով ոստիկանության Էրեբունու բաժնում փաստաթղթեր են կազմվել, որոնք Ա․ Ս․-ի և Գ․ Խ․-ի հետ միասին ներկայացվել են ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին։