Երևանի 146 մանկապարտեզից հետ հավաքած 3850 կգ հավի մսի մեջ հայտնաբերվել է վնասակար բակտերիա

Երևանի քաղաքապետարանն էականորեն ավելացրել է վերահսկողության մակարդակը մանկապարտեզներին մատակարվող սննդի վերաբերյալ։ Գործակարգավորական նիստի ընթացքում հայտնեց Երևանի քաղաքապետ Տիգրան Ավինյանը։

Մինչ այդ  քաղաքապետարանի Վերահսկողության վարչության պետի պաշտոնակատար Աննա Գևորգյանը զեկուցեց, որ ՍԱՏՄ Լաբորատորիայի տված եզակացության արդյունքում արձանագրվել է անհամապատասխանություն՝ Լիստերիա մոնոցիտոգենեզ բակտերիայի առկայություն և որոշում է ընդունվել անհապաղ դադարեցնել մսի ողջ խմբաքանակի օգտագործում և համապատասխան վայր տեղափոխել

«Երևանի146 մանկապարտեզում առկա էր մոտ 3000 կգ հավի կրծքամիս և 850 կգ հավի ազդրամիս»,- տեղեկացրեց նա։

Տիգրան Ավինյանը նշեց, որ բացի այն, որ իրենք ինտենսիվորեն իրականացնում են բոլոր մանկապարտեզների հիմնանորոգում և վերանորոգում, իրենց համար շատ կարևոր է, թե ինչ սնունդ է մատակարարվում մանկապարտեզներին։

«Բոլոր մատակարարներին ուզում եմ տեղեկացնել, ովքեր տարիներ շարունակ ինչ-որ մի տրամաբանությամբ գործել են, այլևս այդ տրամաբանությունները չեն աշխատում և նախկինում հանդուրժվող մոտեցումները սննդի որակի վերաբերյալ այլևս չեն կարող ընդունվել մեր կողմից»,- ասաց քաղաքապետը։

Նա նշեց, թե ուզում է զգուշացնել, որ բոլոր այն իրավաբանական անձինք, որոնք որոշում են կայացնում Երևանի քաղաքապետարանի հայտարարած սննդի մատակարարման մրցույթներին մասնակցել, պետք է իմանան, որ քաղաքապետարանն իր պահանջներում էականորեն ավելի խիստ է։

«Չենք հանդուրժելու անորակ սննդի մատակարարում մեր մանկապարտեզներին։ Ուղղակի անթույլատրելի է, որ մեր երեխաներին նմանատիպ սնունդ մատակարարվի»,-ասաց Տիգրան Ավինյանը։