Ոստիկանությունը պետության ողնաշարն է․ ոստիկանի հասցեին հնչել է էն կարգի հայհոյանք, որը պղծել է մարդու սրբությունը․ Փաշինյան

«2016 թվականի հուլիսյան դեպքերի ժամանակ, երբ ցուցարարների և ոստիկանության միջև միջադեպ տեղի ունեցավ, ես այդ օրն իմ ելույթում ասել եմ, որ ոստիկանությունն ընդհանրապես պետության ողնաշարն է և չի կարելի ոստիկանությանն իր ծառայության համար թիրախավորել։ Չնայած թվում էր, թե անտրամաբանական բան եմ ասում, ես էլ ընդդիմություն»։ Այս մասին կառավարության նիստում հիշեց Նիկոլ Փաշինյանը։

Նա նկատեց, որ միգուցե այդ շրջանի համար անտրամաբանական էր իր ասածը, քանի որ ինքն ընդդիմություն էր, բայց միշտ եղել է այդ տեսակետին։

Փաշինյանը նշեց նաև, որ եղել են բազմաթիվ դեպքեր, երբ ոստիկանությունն անձամբ իր նկատմամբ ուժ է կիրառել։

«Վարչապետ դառնալուց հետո չեմ էլ հետաքրքրվել, բայց ենթադրում եմ, որ շատերն այսօր էլ ծառայում են։ Չկա այդպիսի դեպք, որ ես ասեմ՝ աա՜, հիշում եք, որ 2007 թվականին ինձ սենց բերման ենթարկեցիք, 2008թ.-ին սենց բերման ենթարկեցիք, 2011 թվականին՝ սենց։ Նման եզակի դեպք չկա»,- ասաց Փաշինյանը և, նշեց, թե անկախ այդ ամենից՝ կարևոր է ոստիկանության բարեփոխումների շրջանակներում ոստիկանության ուժի կիրառման հասկանալի ստանդարտ ունենալ։

Ըստ Փաշինյանի` ոստիկանները շատ դեպքերում չեն հասկանում ցուցարարների այն հայտարարությունները, թե իրենց դեմ ուժ են կիրառել, որովհետև ոստիկանը մտածում է, որ իր գործն է արել։

«Մենք այս հարցն ուսումնասիրելով հասկանում ենք, որ մեր երկրում ուժի կիրառման ստանդարտ գոյություն չունի»,- ասաց Փաշինյանը։

Նա ենթադրում է, որ այլ երկրներում կան նման չափանիշներ և դրանք պետք են, որովհետև հաճախ ոստիկանները անձնական են թիրախավորել։

«Երբ որ դեպք է տեղի ունենում, ուզում ենք հասկանանք , թե ինչն է դրա պատճառը պարզվում է՝ ոստիկանության աշխատողի հասցեին հնչել է է՛ն կարգի հայհոյանք, որը մեր իրականության մեջ համարվում է մարդու սրբությունը պղծել։ Սոցիալ հոգեբանության առումով այն համարվում է լեգիտիմություն՝ ինչ-որ գործողություն անելու համար»,- ասաց Փաշինյանը։