Իրական բանակցություններ են պետք, եթե խաղաղություն ենք ուզում հենց Ադրբեջանի հետ․ այս իշխանություններն ունակ չեն բանակցել․ Բագրատ Սրբազան (տեսանյութ)

2020 թվականի նոյեմբերի 9-ի եռակողմ համաձայնագրից Հայաստանի ստորագրությունը հետ կանչել-չկանչելու նպատակահարմարության մասին հարցին հստակ պատասխան հնարավոր է տալ միայն դրան առնչվող բոլոր պրոցեսների մասին ամբողջական տեղեկատվությանը տիրապետելու պարագայում։ Այս մասին իր հարցազրույցի ընթացքում հայտարարել է Բագրատ արքեպիսկոպոս Գալստանյանը։

«Բազմաթիվ վերլուծություններ, քննարկումներ են եղել այս հարցի շուրջ, բայց այս բոլորն իրական է դառնում միայն այն ժամանակ, երբ տիրապետում ես տեղի ունեցածին՝ խորքային իմաստով, երբ ամբողջական տեղեկատվություն ունես։ Մենք տեղյա՞կ ենք արդյոք, թե ի՞նչ ներքին, բանավոր և այլ համաձայնություններ են եղել կամ չեն եղել։ Տեղյակ չենք, ոչ ոք տեղյակ չէ, ամենը ենթադրությունների ժանրից է։

Հետևաբար, կարևոր է, որ իրական բանակցություններ տեղի ունենան՝ հասկանալու համար՝ ի վերջո, այդ ստորագրությունը պետք է մնա՞, թե՞ պետք է դադարի։ Մինչև ամբողջական տեղեկատվությունը չլինի, չհասկանանք, թե՛ շահերի սպասարկումը, թե՛ վտանգները, թե՛ սպառնալիքները, թե՛ դրանից բխող մնացած հետագա քայլերը, պարզունակ կինի բարձրագոչ հայտարարություն անել այդ թեմայով»,- ասաց Բագրատ Սրբազանը՝ հավելելով, որ դիլետանտություն կլինի՝ առանց այդ տեղեկությունն իմանալու գնահատականներ տրվեն։

Նա ընդգծեց, որ այս իշխանությունները որևէ կերպ ունակ չեն իրական բանակցություններ վարել, իսկ դրանք չափազանց կարևոր են, եթե ուզում ենք երկարաժամկետ, կայուն խաղաղություն ունենալ հենց Ադրբեջանի և տարածաշրջանի հետ՝ միջնորդների և երաշխավորների ներկայությամբ, դա պետք է ռազմավարական գիծ լինի։

«Մենք գիտենք, որ այս իշխանություններն ունակ չեն որևէ կետ կատարել այդ համապարփակ փաստաթղթից, այդուհանդերձ, մեզ համար մնում է շատ առանցքային՝ ստորագրությունը թողնելը կամ չթողնելը։ Դրա համար պետք է տիրապետել ամբողջ տեղեկատվությանը՝ որպես առանցք ունենալով իրական բանակցությունները՝ դա կլինի Ռուսաստանի Դաշնության հետ կամ Ադրբեջանի հետ, կամ խառը»,- ասաց նա։

Մանրամասները՝ տեսանյութում