Տուբերկուլոզի համաճարակային իրավիճակը բարելավվում է

Տուբերկուլոզի դեմ պայքարի ազգային ծրագրի շրջանականերում իրականացված միջոցառումների արդյունքում վերջին տարիներին Հայաստանում տարեց տարի արձանագրվում է տուբերկուլոզի համաճարակային իրավիճակի բարելավում:

Այս մասին newspress.am-ին հաղորդեց ՀՀ առողջապահության նախարարության «Տուբերկուլոզի դեմ պայքարի ազգային կենտրոնի» ՊՈԱԿ տնօրեն Արմեն Հայրապետյանը:

Ըստ նրա, 2015 թվականին հիվանդության ցուցանիշը կազմել է 28,8 (2014 թվականին՝ 34,7, իսկ 2013 թվականին՝ 36,6), իսկ մահացության ցուցանիշը` 1.6: 2015 թվականին առաջնակի հիվանդների թիվը կազմել է 885 (2014 թվականին` 1046 դեպք, 2013 թվականին` 1070, 2012 թվականին` 1125): Առաջնակի հիվանդներից 41-ը 0-17 տարեկան երեխաներ են, որը կազմում է առաջնակի դեպքերի 4.9%-ը (2014 թվականին՝ 6.6%): Այս տարիքային խմբում մահվան դեպքեր չեն արձանագրվել:

«2015 թվականին արձանագրված 885 առաջնակի տուբերկուլոզով հիվանդից 73.2%-ը թոքային ձևեր են: Տղամարդկանց շրջանում հիվանդացության ցուցանիշը շուրջ երեք անգամ բարձր է, քան կանանց շրջանում»,-ասաց Հայրապետյանը:

2014 թվականի ընթացքում արձանագրված ՏԲ դեպքերի բարեհաջող բուժման ելքերի ցուցանիշը կազմել է 79, նախորդ թվերի հետ համեմատած ցուցանիշը մնացել է բարձր, 79.6՝ 2013 թվականին, 79.4՝ 2012 թվականին և 77՝ 2011 թվականի ընթացքում:

ԲԴԿ ՏԲ հիվանդացությունը Հայաստանում նախորդ թվականների հետ համեմատած նվազել է: