Սուրեն Գրիգորյան, ընկե՛ր, դու փայ ունե՞ս, թե՞ չունես այդտեղ․ եթե չէ՝ ինչի՞ եք կյանքի գնով ուզում «Թել-Սել»-ը կյանքի կոչվի․ Մեսրոպ Մանուկյանը՝ ուղեվարձերի մասին

«Հենց հիմա ես քաղաքապետարանում նստածներին՝ ի դեմ Սուրեն Գրիգորյանին կոչ եմ անում, վստահ եմ, որ ինձ ուղիղ եթերով հետևում են, իջնեն, գան ինձ հետ բանավեճի, որպեսզի ես ապացուցեմ, թե ոնց են իրենք մինչև ականջների ծայրը կոռուպցիայի մեջ թաթախված»։ Այս մասին Երևանի քաղաքապետարանի դիմաց հրավիրած ասուլիսի ժամանակ հայտարարեց Երևանի ավագանու «Մայր Հայաստան» խմբակցության անդամ Մեսրոպ Մանուկյանը:

Նա նշեց, որ մինչ օրս քաղաքապետարանը չի կարողացել հասնել այն հնարավորությանը, որ մարդիկ իրենց բանկային քարտով կարողանան վճարել ուղեվարձը։

Մի քանի օր առաջ Մանուկյանը խնդիրը փորձել է ներկայացնել Մարդու իրավունքների պաշտպանին։

«Ասում եմ՝ հրատապ խնդիր է, ներկայացնում եմ երևանցիներին, իմ անձնական խնդրով չեմ եկել։ Դուք պարտադրում եք, որ ես իմ բոլոր տվյալները ներկայացնեմ մասնավոր ընկերությանը՝ «Թել-Սել»-ին։ Ես չգիտեմ, ի՞նչ է անելու այդ ընկերությունը մեր տվյալների հետ։ Պետական հովանավորությամբ, պետական պարտադրանքով նրանք մենաշնորհային են սարքում «Թել-Սել»-ին։ Կոռուպցիան պոզով-պոչով չի լինում»,- ասաց նա։

Երևանի ավագանու անդամը երևանցիներին կոչ է անում վաղվանից տրանսպորտ նստելիս ցույց տալ բանկային քարտն ու հայտարարեն. «Սա ճպպացնում եմ քաղաքապետարանի ճակատին, իրենք պետք է համակարգը տեղադրած լինեն, չեն տեղադրել։ Ես իմ 100 դրամը վճարում եմ, սարքը չկա, չեմ վճարում»։ Հիմա հարց եմ տալիս, քաղաքապետարան, ի դեմս Սուրեն Գրիգորյանի, ընկե՛ր, դու փայ ունե՞ս, թե՞ չունես այդտեղ։ Եթե չունեք, ինչի՞ եք կյանքի գնով ուզում, որ «Թել-Սել»-ը կյանքի կոչվի»։

Մանուկյանն ասաց, ամենայն հավանականությամբ, իր ձեռքին եղած փաստերը կներկայացնի իրավապահ մարմիններին։