2015թ.-ի նույն ժամանակահատվածի համեմատ դոլարային տրանսֆերտների 3.4% աճ է գրանցվել

Համաձայն ԿԲ օպերատիվ տեղեկատվության 2016 թվականի հունվար-փետրվարին ընդամենը ներհոսքը կազմել է 165.0 մլն դոլար՝ նախորդ տարվա նույն ժամանակահատվածի 159.7 մլն դոլարի դիմաց (3.4 % աճ):

Այս մասին հայտնում են Կենտրոնական բանկի հասարակայնության հետ կապերի ծառայությունից։

Համաձայն ՀՀ կենտրոնական բանկի տվյալների 2015 թվականին ՀՀ ֆիզիկական անձանց՝ ՀՀ առևտրային բանկերի միջոցով ֆիզիկական և իրավաբանական անձանց կողմից արտերկրից փոխանցած գումարները կազմել են 1,623.6 մլն ԱՄՆ դոլար՝ նախորդ տարվա 2,123.6 մլն դոլարի դիմաց (նվազում 23.5 %-ով):

Ընդ որում, այդ ստացված գումարների 46.3 %-ը կազմել են ռուսական ռուբլով փոխանցումները՝ 2015 թվականին կազմելով 45.7 մլրդ ռուբլի, որը նախորդ տարվա 43.3 մլրդ ռուբլու նկատմամբ աճել է 5.7 %-ով:

Ազգային արժույթով արտահայտված՝ 2015 թվականին ստացված գումարները կազմել են 776.3 մլրդ դրամ՝ նախորդ տարվա 881.9 մլրդ դրամի դիմաց, որը ենթադրում է դոլարային արտահայտությամբ ներհոսքի վերը նշված 23.5 % անկման համեմատ ավելի փոքր՝ 12.0 % նվազում:

Համաձայն ԿԲ օպերատիվ տեղեկատվության 2016 թվականի հունվար-փետրվարին ընդամենը ներհոսքը կազմել է 165.0 մլն դոլար՝ նախորդ տարվա նույն ժամանակահատվածի 159.7 մլն դոլարի դիմաց (3.4 % աճ): Դրամային արտահայտությամբ ստացված գումարները կազմել են 81.0 մլրդ դրամ՝ նախորդ տարվա 76.2 մլրդ դրամի դիմաց (6.3 % աճ):