Իշխանությանը պակասում է 25-ամյա երիտասարդի կամքը

Արդեն մեկ շաբաթ է, ինչ գյումրեցի լուսանկարիչ 25-ամյա Հայկ Բարսեղյանի կողմից Գյումրիի անօթևան ընտանքների համար բնակարանի ձեռքբերման նպատակով կազմակերպված դրամահավաքությանը միանում են անհայտ ու հայտնի մարդիկ:

25 ամյա երիտասարդի SOS-ին անմիջապես արձագանքեցին աշխարհահռչակ շանսոնյե Շառլ Ազնավուրն ու System of down աշխարհահռչակ խմբի հիմնադիր, ամերիկահայ ռոք երաժիշտ Սերժ Թանկյանը, հայազգի հանրահայտ կիսապաշտպան Հենրիխ Մխիթարյանը, Մադրիդի «Ռեալ» թիմի առաջնորդներն էլ իրենց ստորագրություններով մարզաշապիկներ են հանել աճուրդի, աճուրդի է հանվել նաև «Բարսելոնա»-ի դրոշը` 10 հանրահռչակ ֆուտբոլիստների ստորագրությամբ: Եվ այս ողջ հանգանակությունը կուղղվի Գյումրիի տնակային ավանում ապրող 13 ընտանիքի բնակարան տրամադրելու նպատակով:

Այն, որ 25 ամյա երիտասարդի քայլը իրապես խրախուսելի է, երկրորդ կարծիք լինել չի կարող, բայց իր այս քայլով երիտասարդ Հայկ Բարսեղյանը պարզապես Գյումրին ղեկավարած քաղաքապետերի, մարզպետների և ընդհանրապես այս տարիների տարբեր իշխանավորների երեսին շպրտեց մի պարզ ճշմարտություն` այս երկրում խնդիր լուծելու համար անհնարին ոչինչ չկա, պարզապես կամքն է բացակայում, իսկ կամքը թղթի վրա գրված ճոռոմ խոսքը չէ, այս ու այնտեղից փող բերել ու մսխելը չէ: Կամքը ցանկություն է` ուղղորդված իրական գործողությամբ: Շուրջ ութ տարի է, որ գործում է Սփյուռքի նախախարությունը. հսկայական մի կառույց ութ տարի շարունակ սնվում է հարկատուների հաշվին և միայն այդքան:

Սիրիահայերի հետ կապված խնդիրը արդեն ապացուցեց այդ նախարարության անկենսունակությունը: Նախարար Հրանուշ Հակոբյանը Նոր Հալեպ էր կառուցում` սիրիահայերին էլ տուն կանչում: Նոր Հալեպի կառուցման համար անմիջապես դրամահավաք սկսվեց` ով որքան կարողանար: Միայն երջանկահիշատակ Հրանտ Վարդանյանը 100,000 ԱՄՆ դոլար նվիրեց այդ նպատակի իրականացման համար, սակայն Նոր Հալեպը չկառուցվեց, սիրիահայերն էլ ինչպես տուն եկան, այնպես էլ գնացին: Իսկ 100.000 ու մնացած հանգանակությունն էլ գնաց «շաբաշ»:

Սփյուռքահայերը արդեն առանց կաշկանդվելու ասում են, որ պետական կառույցներին չեն վստահում և շատերը նույնիսկ դադարեցրել են համահայկական հիմնադրամին ֆինանսավորել: Սա Հրանուշ Հակոբյանի քաղաքականության արդյունքն է: Իսկ գյումրեցի այս երիտասարդի անշահախնդիր արարքը ապացուցեց, որ մեզ իրականում մարզպետարան, քաղաքապետարան, սփյուռքի նախարարություն ու նմանատիպ պորտաբույծ այլ կառույցներ հարկավոր չեն, որոնց լինելիությամբ պակասում է հավատը, վստահությունը, փոխարենն ավելանում է արտագաղթը: