Կոչ եմ անում համաձայնագրի ստորագրումն ավարտել այս տարի. Ջո Բայդենը նամակ է հղել Ալիևին

ԱՄՆ նախագահ Ջո Բայդենը նամակ է հղել Ադրբեջանի նախագահ Իլհամ Ալիևին, որում գոհունակություն է հայտնել Ադրբեջանի և Հայաստանի միջև խաղաղության համաձայնագրի կնքման ուղղությամբ արձանագրված առաջընթացի կապակցությամբ։ Նա ընդգծել է, որ այս համաձայնագիրը կնպաստի երկու երկրի հարաբերությունների կարգավորմանը և վստահեցրել, որ Միացյալ Նահանգները պատրաստ է աջակցել կայուն և արդար խաղաղության ձեռքբերմանը, որը վերջ կդնի երկարաժամկետ հակամարտությանը:

Այս մասին հաղորդում է Minval.az-ը:

«Ես գոհ եմ ձեր երկրի և Հայաստանի միջև  խաղաղ համաձայնագրի ուղղությամբ կայուն առաջընթացը, որը կնպաստի երկու երկրների միջև հարաբերությունների կարգավորմանը։ Ուզում եմ ձեզ վստահեցնել, որ Միացյալ Նահանգները պատրաստ է աջակցել Ադրբեջանի և Հայաստանի միջև կայուն և արդար խաղաղության հասնելուն, որը վերջնականապես վերջ կդնի դարավոր հակամարտությանը։ Խաղաղության համաձայնագիրը, որն ապահովում է Ադրբեջանի ինքնիշխանությունն ու տարածքային ամբողջականությունը, միաժամանակ կվերափոխի ողջ տարածաշրջանը և կօգնի մեծացնել առևտուրը, ներդրումները և կապերը Եվրոպայի և Կենտրոնական Ասիայի միջև: Այն ժամանակ, երբ աշխարհի ուշադրությունը կենտրոնացած է Բաքվում կայանալիք COP29-ի շուրջ, դուք եզակի հնարավորություն ունեք համաշխարհային հանրությանը ցույց տալու ձեր նվիրվածությունը խաղաղությանը: Ինչպես գիտեք, խաղաղության համաձայնագրի չլուծված մասերի վերջնականացումը կպահանջի զիջումներ երկու կողմերից: Այնուամենայնիվ, վստահ եմ, որ դուք կշարունակեք օգտվել այս հնարավորությունից։ Կոչ եմ անում համաձայնագրի ստորագրումն ավարտել այս տարի»,- ասված է նամակում։