Ընտրական օրենսգրքի «բազարը»

«Իշխանությունները իրենց ոճին հավատարիմ, Ընտրական օրենսգրքի հետ կապված գործընթացները կատարեցին գաղտնի ռեժիմով` նվազագույնի հասցնելով քաղաքացիական սեկտորի մասնակցությունը»,-newspress.am-ի հետ զրույցում ասաց «Իրազեկ քաղաքացիների միավորում» հասարակական կազմակերպության նախագահ Դանիել Իոնիսյանը:

Նա հիշեցրեց, որ ի պատասխան «Իրազեկ քաղաքացիների միավորում» ՀԿ-ի հարցման՝ ՀՀ արդարադատության նախարարությունը 2016 թվականի փետրվարի 23-ի պատասխան-գրությամբ տեղեկացրել էր, որ ընտրական օրենսգրքի նախագիծը գտնվում է մշակման փուլում և աշխատանքներն ավարտելուն պես կդրվի հանրային քննարկման և հասանելի կլինի կայքում: Մինչդեռ, դրա նախորդ օրը՝ փետրվարի 22-ին Եվրոպայի խորհրդի «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) պաշտոնական կայքում արդեն տեղադրվել էր Ընտրական օրենսգրքի նախագծի անգլերեն տարբերակը:

Դանիել Իոնիսյանը նաև նշեց, որ ֆորմալ առումով ուշ չէ, հիմա գոնե քաղաքացիական սեկտորի ձայն լսելը, բայց խնդիրն այն է, որ իշխանությունը միտումնավոր նահանջի դրույթներ է ներառել, ուշադրությունը շեղելու համար:

«Նախագծի վերջնական տարբերակում կհանվի այն կետը, որով յուրաքանչյուր ընտրական տեղամասում միաժամանակ գտնվող տեղացի դիտորդների ու ԶԼՄ ներկայացուցիչների ընդհանուր թիվը սահմանափակվել է 8-ով կամ ոչ միայն միջազգային, այլև տեղական դիտորդական կազմակերպություննները կարող են մասնակցել ընտրություններին բացառապես ՀՀ նախագահի, վարչապետի, Աժ նախագահի կամ ԿԸՀ-ի հրավերի առկայության դեպքում»,-մանրամասնեց նա:

Դանիել Իոնիսյանը ասաց, որ նման դրույթները կհանվեն, որպեսզի ցույց տան, թե քաղաքացիական հասարակության պահանջները կատարում են. սա ընդամենը Արևելյան բազար է»,-ասաց նա:

Դանիել Իոնիսյանը մահոգիչ է համարում համամասնականի ռեյտինգային ընթացակարգը, այդ տարբերակը իրական վտանգ է ներկայացնում և անթույլատրելի է:

Ինչ վերաբերում է Էլեկտրոնային քվեարկությանը, ապա ըստ Ինոնիսյանի, այն ընտրակեղծիքները չի նվազեցնի Հայաստանում: ՀԿ նագահը հիշեցրեց, որ 2012 թ-ի ընտրությունների ժամանակ էլեկտրոնային վիճակահանությամբ ընտրողների մեծ թիվ ունեցող տեղամսերը բաժին հասան Հանրապետականին. «սա երջանիկ պատահականություն լինել չէր կարող»,-եզրափակեց նա: