Դաշնակցակաները Հանրապետականից ավելի Հանրապետական են խաղում

Մոտ մեկ տարի առաջ էր, որ վարչապետ Հովիկ Աբրահամյանը ստեղծեց հակակոռուպցիոն խորհուրդ` հայտարարելով, որ խորհուրդը պայքար է մղելու կոռուպցիայի դեմ: Ի սկզբանե խորհուրդը հայտնվեց քննադատության թիրախում, քանի որ խորհուրդի կազմում էին վարչապետը, արդեն նախկին ֆիննախ Գագիկ Խաչատրյանը և պաշտոնատար այլ անձիք: Շատերը նույնիսկ չթաքցրին` ասելով, որ կոռուպցիոներները չեն կարող պայքարել կոռուպցիայի դեմ: Իրականում այդպես էլ եղավ ` կոռուպցիան ոչ միայն չի պակասում, այլև մետաստազի նման տարածում է ստանում տարբեր ոլորտներում: Անգամ ԵՄ ու ԵՏՄ տարբեր տրամաչափի պաշտոնյաներ, դեսպաններ ահազանգեցին ՀՀ-ում կոռուպցիայի մասին:

Կոռուպցիոն վերջին ահազանգը հնչեցրեց ԵՏՄ պաշտոնյան Հայաստան ներկրվող մեքենաներից ավելացված ԱԱՀ գանձելու մասով: Ու քանի դեռ ԵՏՄ-ն չէր ահազանգել, մեր հակակոռուպցիոներները հանգիստ խղճով ԱԱՀ էին գանձում: Ու ստացվեց, որ մի ամբողջ խորհուրդ աշխատում է, որ այլ երկրների պաշտոնյաները պաշտպանեն մեր քաղաքացիներին` անհարկի շորթվելուց: Բայց ամենից զավեշտալին դեռ առջևում է. դա ՀՀԿ-ՀՅԴ համաձայնագիրն է, որով կողմերը խոստանում են պայքարել կոռուպցիայի դեմ: Քաղաքական պատասխանատվություն ստանձնած ՀՀԿ-ին ո՞վ էր խանգարում պայքարել կոռուպցիայի դեմ, կամ այդ ինչ պայքար պետք է մղի կոռուպցիայի դեմ ՀՅԴ-ն, որ ՀՀԿ-ն չէր կարող անել միայնակ, առավել ևս, որ Դաշնակցությունը դրա հնարավորությունը դեռ Քոչարյանի նախագահության տարիներին ունեցել է:

Ժամանակին նույն Քոչարյանին կոռուպցիայի դեմ պայքարելու խորհուրդ էր տալիս դաշնակցական խորհրդականը: Ինչ է ստացվում և ինչու է նորից արծարծվում կոռուպցիայի դեմ պայքարը. նախ այս համաձայնագրով ՀՀԿ-ն ասում է, որ Հովիկ Աբրահամյանը չի կարող ու չի էլ ուզում պայքարել կոռուպցիայի դեմ, երկրորդ կոռուպցիայի դեմ պայքարը շահարկելով այդ ուղղությամբ տրվող գումարները կգնան այնտեղ, ուր պետք է, և վերջապես կոռուպցիան կմնա իր տեղում, իսկ ՀՅԴ-ն կհանձնվի կոռուպցիայի դեմ պայքարի հարցում մի պարզ պատճառով` այսօր շատ ու շատ դաշնակցականեր բիզնեսմեն դաշնակցականեր են ու դժվար թե իրենք իրենց դեմ հանդիման դուրս գան: Օրինակ` կառավարության նիստում դաշնակներին կարծես թե կոռուպցիայի դեմ պայքարի հնարավորություն էր տրվել` այն է ապաքաղաքականացնել բուհերը, բայց դաշնակցական նախարարը միանգամից ըմբոստացավ բուհերի ապաքաղաքական լինելու առաջարկի դեմ: Իսկ շան գլուխը նաև այդտեղ է թաղված: Այնպես որ, հեղափոխակաները ընդամենը փորձում են Հանրապետականից ավելի Հանրապետական լինել: