Հայ-ադրբեջանական սահմանի երկայնքով Եվրամիության անզեն քաղաքացիական առաքելության տեղակայումը վճռորոշ դեր է խաղացել վերջին երկու տարվա ընթացքում սահմանային միջադեպերի թվի նվազեցման գործում. ՀՀ նախագահը` Համբուրգում

Հանրապետության նախագահ Վահագն Խաչատուրյանը Համբուրգի կայունության համաժողովի շրջանակում հանդես է եկել ելույթով:

«Համաժողովի նպատակը հնչում է հետևյալ կերպ՝ «Առողջ մոլորակում` ավելի լավ ապագա բոլորի համար»: Արդյո՞ք մենք բավականաչափ արագ ենք հասնում մեր նպատակներին և համապատասխանում դրանց բոլոր պահանջներին, ավաղ, ո՛չ:

Համաժողովի ծրագիրն ուսումնասիրելիս՝ տրամաբանորեն ընտրեցի պանելային քննարկման հետևյալ խորագիրը. «Խաղաղաշինություն՝ կայուն զարգացում ապահովելու համար»:

Ցավոք, խաղաղաշինությունն ու խաղաղապահությունը հրատապ խնդիրներ են ոչ միայն իմ երկրի և իմ տարածաշրջանի համար, այլ նաև դրանց սահմաններից դուրս, և Մերձավոր Արևելքում առկա իրավիճակը դրա վառ օրինակն է։

Խոստովանենք, որ ներկայումս մենք բախվում ենք Երկրորդ համաշխարհային պատերազմից ի վեր ամենամեծ թվով բռնի բախումներին, և մարդկանց ապահովությունը և անվտանգության զգացումը մարդկության պատմության մեջ ամենացածր մակարդակի վրա է: Այսինքն՝ մարդիկ չեն կարողանում լիարժեքորեն դրսևորել և ի ցույց դնել իրենց տաղանդներն ու զարգացնել ներուժը` ի նպաստ հասարակության զարգացման, քանի որ կա նոր պատերազմի կամ հակամարտության վտանգ:

Սա նշելով, մենք համակարծիք ենք, որ մեր առջև ծառացած խնդիրները կարող են լուծվել միայն միջազգային համագործակցության ամրապնդման միջոցով:

Այս համատեքստում կցանկանայի ողջունել Գերմանիայի և Նամիբիայի գլխավորությամբ՝ Միավորված ազգերի կազմակերպության կողմից վերջերս ընդունած «Հանուն ապագայի դաշնագիրը», որն ուղղված է միջազգային համագործակցության ամրապնդմանը և կայուն զարգացմանը:

Խաղաղության կերտումը և խաղաղապահությունն օգնել են վերջ դնել պատերազմներին, կանխել հակամարտությունների և լարվածության վերաճումը լայնածավալ բռնության: Այս առումով թույլ տվեք բերել իմ երկրի օրինակը։

Հայ-ադրբեջանական սահմանի երկայնքով Եվրամիության անզեն քաղաքացիական առաքելության տեղակայումը վճռորոշ դեր է խաղացել վերջին երկու տարվա ընթացքում սահմանային միջադեպերի թվի նվազեցման գործում:

Ինչպես շեշտվել է դաշնագրում, մենք ակնկալում ենք ունենալ ապահով, խաղաղ, կայուն աշխարհ, որտեղ տիրում է արդարություն, հավասարություն և, որտեղ բարեկեցությունը, անվտանգությունն ու արժանապատվությունը երաշխավորված են բոլորի համար:

Զարգացման, «կանաչ անցման» և կայունության ֆինանսավորումը պետք է լինի այս խնդիրների լուծմանն ուղղված մեր ջանքերի կենտրոնում ՝ հատուկ ուշադրություն դարձնելով զարգացող երկրներին և հատուկ իրավիճակում գտնվող երկրներին:

Մենք պետք է բարեփոխենք միջազգային ֆինանսական համակարգը, որպեսզի ապահովենք զարգացման արդյունավետ ֆինանսավորում՝ հաշվի առնելով միջին եկամուտ ունեցող երկրների հատուկ կարիքները։

Մենք նաև փորձում ենք ներդնել նոր և նորարարական մոտեցումներ՝ օգնելու զարգացող երկրներին բավարարել իրենց կարիքները։ Նման նախաձեռնություններից մեկը «Պարտք կլիմայի դիմաց» մեխանիզմն է, որը մենք առաջարկում ենք օգտագործել կլիմայի ֆինանսավորման համատեքստում՝ որպես օգտակար գործիք զարգացող երկրների պարտքի բեռը մեղմելու համար՝ կլիմայի փոփոխության հետևանքները մեղմելու նրանց ջանքերի դիմաց։

2030 թվականի օրակարգում հստակ նշված է, որ չկա կայուն զարգացում առանց խաղաղության, և խաղաղություն՝ առանց կայուն զարգացման:

Առաջնորդվելով հենց այս փիլիսոփայությամբ և խաղաղության հաստատուն հանձնառությամբ՝ Հայաստանի կառավարությունը ձեռնարկում է տարածաշրջանում խաղաղության և բարգավաճման հաստատմանն ուղղված գործողություններ: Հայաստանի կառավարությունը հանդես է եկել «Խաղաղության խաչմերուկ» նախաձեռնությամբ, որն ուղղված է տարածաշրջանի տնտեսական ներուժի բացահայտմանը և տնտեսական ու մշակութային կապերի ամրապնդմանը՝ դրանով իսկ նպաստելով քաղաքական երկխոսությանը և համապարփակ խաղաղության հասնելուն՝ ի շահ մեր տարածաշրջանի բոլոր ժողովուրդների:

Լիահույս ենք, որ բոլոր շահագրգիռ երկրները, ինչպես մեր տարածաշրջանում, այնպես էլ դրա սահմաններից դուրս, փոխադարձաբար կպատասխանեն կայուն խաղաղության հասնելու և մեր եռանդը դեպի կայուն զարգացում և կանաչ աճ ուղղորդելու մեր ջանքերին:

Եզրափակելով խոսքս՝ ցանկանում եմ ևս մեկ անգամ շնորհակալություն հայտնել Գերմանիայի կառավարությանը այս կարևոր նոր նախաձեռնությանը մասնակցելու հրավերի համար և մաղթել ամենայն հաջողություն դրա իրականացման գործում»: