Տավուշում թափուկ վառելափայտ նախատեսված է միայն նպաստառու 2500 ընտանիքների համար

Տավուշի մարզի սահմանամերձ, անտառամերձ բնակավայրերի բնակիչներին ամեն տարի աշնանը անտառում 8 խորանարդ մետր վառելափայտի թափուկ պատրաստելու թույլտվություն էր տրվում։ Այս տարի, աշնանը վառելափայտի թափուկ նախատեսվել է նպաստառու ընտանիքների համար։ Այդ մասին ահազանգում է տավուշեցի լրագրող Ոսկան Սարգսյանը․

 Այս առթիվ լրագրողը տեղեկատվական հարցում է ուղարկել «Հայանտառ» ՊՈԱԿ-ի տնօրեն Սևակ Մարկոսյանին։ Պատասխանը․ «Հայանտառ» ՊՈԱԿի «Անտատնտեսություն» մասնաճյուղերի կողմից անտառամերձ բնակավայրերի բնակչությանն անվճար թափուկ վառելափայտի օգտագործման տոմսեր տրամադրելու ժամկետ է սահմանվել սույն թվականի սեպտեմբերի 9-ից նոյեմբերի 29-ը։ 

Տրամադրվող թափուկ վառելափայտի չափաքանակները հաշվարկված և սահմանված են՝ համաձայն «Անտառտնտեսություն» մասնաճյուղերի կառավարման պլանների՝ տարվա ընթացքում գոյացող թափուկ վառելափայտի ծավալներին համապատասխան։ «Անտառտնտեսություն» մասնաճյուղերին հանձնարարվել է տրամադրման ընթացքում առաջնահերթությունը տալ ընտանիքների անապահովության գնահատման համակարգում հաշվառված, ընտանեկան և սոցիալական նպաստ ստացող անձանց։Թափուկ վառելափայտի ծավալների և շահառուների քանակի վերաբերյալ տեղեկատվություն կարող ենք տրամադրել գործընթացի ավարտից հետո»։ 
 

«Հայանտառից» տրամադրել են նաև անվճար թափուկ վառելափայտի բացթողնման չափաքանակները՝ համաձայն Տավուշի մարզի անտառտնտեսությունների անտառկառավարման պլանների՝ Արծվաբերդի անտառտնտեսություն՝ 7 000 խմ, Նոյեմբերյանի անտառտնտեսություն՝ 5000խմ, Սևքարի անտառտնտեսություն՝4000 քմ, Իջևանի անտառտնտեսություն՝ 3000խմ, ընդհանուր՝ 19000 խմ։ Այդ 19 հազար խմ-ն 2500 ընտանիքների համար նախատեսված, 8 խմ ծավալով թափուկ վառելափայտի ընդհանուր ծավալն է։ Նոյեմբերի 29-ից հետո պարզ կդառնա, թե նախատեսված 19 հազար խմ թափուկից որքա՞նն է տրվել նպաստառու ընտանիքներին։ Մի բան ակնհայտ է, թափուկ վառելափայտը միայն նպաստառու ընտանիքներին տրամադրելը հանգեցնելու է ձմռան շեմին վառելափայտի թանկացմանը, ինչից շահելու են Նիկոլ Փաշինյանի մտերիմները։