ԸՕ քննարկումների հիմնական բեռը տեղափոխվելու է քաղաքական դաշտ

Կառավարությունն ազդարարեց Ընտրական օրենսգրքի հանրային քննարկումների սկիզբը: Այսօր կառավարության նիստի ժամանակ այս մասին հայտարարեց ԸՕ աշխատանքային խմբի անդամ Դավիթ Հարությունյանը:

Ընտրական օրենսգրքի հենքը Սահմանադրական փոփոխություններն են: Փաթեթը մշակելու համար սահմանվել է 13 աշխատանքային օր: Մինչ փաստաթուղթը Ազգային ժողովի քննարկմանը ներկայացնելը այն հաստատվեց կառավարության նիստում:

Դավիթ Հարություննյանի խոսքով՝ քննարկումների հիմնական բեռը տեղափոխվելու է քաղաքական դաշտ՝ Ազգային ժողով: Այս փաթեթի ընդունման համար վերջնաժամկետ է սահմանվել այս տարվա հունիսի 1-ը:

«Եթե այսօր հաստատում ենք այս փաթեթը, ազդարարում ենք հանրային քննարկումների սկիզբը, որը տեղի կունենա Ազգային ժողովում»,- ասաց Դավիթ Հարությունյանը:

Կառավարության նիստում ԸՕ նախագիծը ներկայացնելով, նա առանձնացրեց հատկապես մի քանի, իր որակմամբ, կարևոր կետեր:
Գյումրիում և Վանձորում կլինեն համամասնական ընտրություններ՝ Երևանի մոդելով:

Ազգային ժողովը ևս պետք է ձևավորվի համամասնական ընտրությունների արդյունքում: Այս օրենսգիրքը ԱԺ մեծամասնական ընտրություններ այլևս չի նախատեսում:

Հաջորդ կարևոր փոփոխությունը Կենտրոնական ընտրական հանձնաժողովի ձևավորումն է:

ԿԸՀ-ն այլևս կձևավորվի ԱԺ կողմից՝ ապահովելով 3/5 մասը, այսինքն 60%-ով կապահովվի քաղաքական ներկայացուցչությունը:
Ընդ որում՝ ԿԸՀ անդամը չի կարող ընտրվել 2 անգամից ավել:

Ինչ վերաբերում է բուն ընտրակարգին, ապա կներդրվի էլեկտրոնային հաշվառման համակարգ, որը կբացառի կրկնակի քվեարկությունը:
«Հնարավորություն է ստեղծում պայքարել առավել շատ մտահոգություն առաջացնող երևույթի դեմ: Հանրապետությունից բացակայողները չեն կարող քվեարկել»,- ասաց Հարությունյանը՝ պարզաբանելով, որ էլեկտրոնային սարքը հնարավորություն ունի ընթերցել անձը հաստատող փաստաթուղթը:

Եթե սարքը հաստատում է, որ տվյալ ընտրողը գրանցվում է առաջին անգամ, ապա թույլատրում է նրան քվեարկել, որից հետո նրան հատկացնում են քվեաթերթիկներ փաթեթ:

Դավիթ Հարությունյանն առաջարկեց նախագիծը ճանաչել անհետաձգելի, բայց հանրությունը պետք է իմանա, որ քննարկումների համար կա երեք ամիս ժամանակ:

Հաստատելով նախագիծը՝ վարչապետ Հովիկ Աբրահամյանը նկատեց, որ առջևում ծավալուն աշխատանք է սպասում: