Փոքր ռեսուրսներով հնարավոր է թշնամուն կաթվածահար անել․ նախկին պատգամավոր

ԲՀԿ անդամ, ԱԺ նախկին պատգամավոր Արման Աբովյանը գրել է․

Իրականում բարոյական և էթիկական նորմերը մի կողմ դնելով (չնայած այս դեպքում դա մարդկային տեսանկյունից շատ դժվար է) Իսրայելի գործողությունները ցույց են տալիս, որ տեխնոլոգիաների կրեատիվ օգտագործումը հակառակորդի դեմ պատերազմը բոլորովին այլ մակարդակի է հասցրել։ 

Լիբանանյան փեյջերներում տեղադրված պայթուցիկների պատմությունը, որոնք հեռահար ազդանշանով զանգվածաբար պայթում էին շիաների «Հըզբոլլահ» շարժման անդամների ձեռքում, ցույց տվեց, որ ներկայիս պատերազմներում հնարավոր է հեռակա, փոքր ուժերով և ռեսուրսներով կաթվածահար անել հակառակորդի «հետևակին»:

Հետաքրքիր է ուսումնասիրել, թե ինչպես են գործել Իսրայելի հատուկ ծառայությունները։
Սկզբում սկսեցին չեզոքացնել «Համաս» և «Հըզբոլլահ» կազմակերպությունների բարձրագույն կառավարչական թևը, այնուհետև ականապատ փեյջերների միաժամանակյա պայթեցման օգնությամբ զգալի  վնաս հասցրեցին վերը նշված կազմակերպությունների միջին օղակին, իսկ դիմադրության մարտիկների ստորին մասը չեզոքացվեցին ռմբակոծություններով։ 

Այս սխեման Իսրայելին թույլ տվեց զգալիորեն թուլացնել հակառակորդին՝ ռազմական գործողությունների ակտիվ փուլից առաջ, ընդ որում, սեփական շարքերից առանց կորուստների՝ նկատեք։

Միանգամից վերապահում անենք, որ Իսրայելի գործողությունները պաղեստինցիների նկատմամբ գլոբալ մասշտաբով հանցագործություն և Ցեղասպանություն են, սակայն մենք պարզապես պարտավոր ենք ուշադիր ուսումնասիրել Իսրայելի փորձը՝ զուտ ռազմական հետևանքների  առումով, քանի որ թուրք-ադրբեջանական տանդեմի հետ անխուսափելի դիմակայությունը մեզանից պահանջում է ոչ պակաս կրեատիվություն և հնարամտություն, իսկ 1991-1994 թվականների պատերազմի փորձը ցույց է տալիս, որ եթե մենք ուզում ենք, ապա կարող ենք փոքր ուժերով և տեխնոլոգիական մտահղացումներով հաղթել։

Իհարկե, պետք է նաև ընդգծել, որ Իսրայելը գործում էր խախտելով բոլոր գրված և չգրված օրենքները, քանզի իր հակապաղեստինյան մոլուցքի մեջ սպանում է քաղաքացիական բնակչությանը և դա ուղղակի Ցեղասպանություն է։
Ի դեպ, միանգամից նշենք, որ Իրանը ևս նոր ձևաչափով պատերազմ վարելու շատ մեծ փորձ ունի, և իսրայելցիներին վաղ է «հանգստանալ»,  իրանցիներն իրենց լրջագույն խոսքն անպայման կասեն այս նոր տեխնոլոգիաների պայքարում: 
Հաստատ։