Մի բան է արդար` սեփական ընտանիքն ուրացողը, ճամբարափոխն արժանի է նման վերաբերմունքի. «Հրապարակ»

«Հրապարակ» թերթը գրում է.

«Մինչ մենք սին հույսեր ենք փայփայում, թե իշխող քաղաքական ուժը կհասկանա, որ հայ ժողովրդի պոտենցիալը մեծ չէ, իսկ խնդիրները շատ են, եւ կփորձի որքան հնարավոր է արդյունավետ օգտագործել մեր ռեսուրսները՝ հրաժարվելով սեւ-սպիտակ, յուրայիններ-թշնամիներ եզրույթներից, ՔՊ-ն ճիշտ հակառակն է անում՝ պառակտում է հանրությանը, նորից ասպարեզ է բերում նախկիններ-ներկաներ, «նախկինը մեզնից պաշտոն չպետք է ստանա» մոտեցումները: Եվ, որ ամենաանթույլատրելին է, դա անում է կյանքում ոչինչ չհասած մի քանի կին պատգամավորի ձեռքով: Ես, իհարկե, Գրիգոր Մինասյանի պաշտպանը չեմ, եւ ինձ համար բացարձակապես միեւնույն է, թե Նիկոլ Փաշինյանի կաբինետում ով կզբաղեցնի արդարադատության կամ կրթության, առողջապահության կամ էկոնոմիկայի նախարարի պաշտոնները, որովհետեւ նրանց անձից ոչինչ կախված չէ` ամեն ինչ մեկ մարդ է որոշում: Բայց ինչպես կարելի է այսքան վարկաբեկել «իշխանություն» գաղափարը, ինչպես կարելի է հողին հավասարեցնել նախարարի պաշտոնը, ինչպես կարելի է առաջնորդվել գայլերի ոհմակներում տիրող կանոններով, որտեղ ոչ թե մարդու, անհատի որակներն են դեր խաղում, այլ՝ մերոնքական լինել-չլինելը, ինչ-որ մարդկանց խնդրանքները կատարել-չկատարելը:

Վստահ եմ` Մինասյանի դեմ ելած 27 անձից յուրաքանչյուրն ունի շատ կոնկրետ, պուճուր շահ, որով առաջնորդվելով՝ միացել է այդ ստորագրահավաքին: Բայց ինչո՞վ է առաջնորդվում նախարարին նշանակող վարչապետը, որը, փաստորեն, ոչ միայն Ալիևի ու Էրդողանի կամքն է սիրով կատարում, այլեւ արփիների ու լուլուների: Ինչո՞վ է առաջնորդվել ինքը` Մինասյանը, գուցե իրակա՞ն են այն լուրերը, որ քրեական հետապնդումից խուսափելու համար է դիմում գրել: Մի բան է արդար` սեփական ընտանիքն ուրացողը, ճամբարափոխն արժանի է նման վերաբերմունքի»: