Ամեն անգամ, երբ Ազգային ժողովում հանդիպում եմ այդ երիտասարդին, ամոթից գլուխս կախում եմ. Գեղամ Մանուկյան

Ազգային ժողովի պատգամավորնե'ր, Պետական պահպանության ծառայության այն ծառայողները, որ իրականացնում են հսկողություն նաև Ազգային ժողովի տարածքում և որոնց գործղություններից երբեմն դժգոհ ենք, էդ ծառայղների թվում կա մի երիտասարդ, որը մասնակցել է 44- օրյա պատերազմին որպես զինծառայող, Արցախի նախագահի կողմից արժանացել է «Մարտական խաչ» 2-րդ աստիճանի շքանշանի: Այս մասին Ազգային ժողովի նիստում ասաց ԱԺ «Հայաստան» խմբակցության քարտուղար Գեղամ Մանուկյանը: 

«Հերոսական մարտական ուղի է անցել, բայց ի տարբերություն ՀՀ նախագահի կողմից «Մարտական խաչ» 1-ին, 2-րդ աստիճանի շքանշանակիրների, որոնք նաև նյութական ամենամսյա վճարում են ստանում, այդ երիտասարդը, որն անցել է հերոսական մարտական ուղի, զրկված է դրանից, որովհետև Ազգային ժողով կառավարությունը բերեց մի նախագիծ, որով տարբերակում դրվեց «Մարտական խաչ»-երի շքանշանակիրների միջև. Արցախի Հանրապետության նախագահի կողմից «Մարտական խաչ»-ի արժանացածները դուրս մնացին այդ ցանկից»,- ասաց Մանուկյանը:

Նա նշեց, որ ամեն անգամ միջանցքում կամ անցակետում հանդիպում է այդ երիտասարդին, ամոթից գլուխը կախում է.

«Այդ երիտասարդը, որը մեր բոլորիս խաղաղությունն է ապահովել, հայրենիքի սահմաններն է պաշտպանել, այդ փոփոխության արդյունքում այսօր այնպես չի գնահատված, ինչպես մյուսները»,- ասաց պատգամավորը: