Լուլուն Նիկոլ Փաշինյանից պատրաստվում է հաշվետվությո՞ւն պահանջել

6 տարին բավարար ժամանակ է, որպեզի ես կարողանամ հաշվետվություն պահանջել կառավարության բոլոր անդամներից։ Այս մասին լրագրողների հետ զրույցում ասաց ՔՊ-ական Լուսինե Բադալյանը՝ անդրադառնալով հարցին, թե ինչու ՔՊ-ականներն անվստահություն հայտնեցին Արդարադատության նախարար Գրիգոր Մինասյանին և հրաժարական պահանջեցին։ 

«Ես իմ առջև խնդիր եմ դրել»,- ասաց նա։

Լուլուն վստահեցրեց, որ բոլորից պետք է հաշվետվություն պահանջի և իմանա՝ արդյոք այն բոլոր ծրագրերը, որ ՔՊ-ն դրել է կառավարության անդամների առջև, նրանք կատարե՞լ են։

«Ուզում եմ ասել` այստեղ ոչ մի անձնական խնդիր չկա Գրիգոր Մինասյանի հետ կապված։ Նա ազատվել է իր դիմումի համաձայն»,- ասաց Լուսինե Բադալյանը։

Լրագրողների դիտարկմանը, թե՝ ՔՊ-ն Մինասյանի դեմ ստորագրահավաք էր սկսել, ՔՊ-ական պատգամավորը ցավ հայտնեց, որ այդ տեղեկությունը բոլորին հայտնի է դարձել։

«Ցավում եմ, որ ստորագրահավաքի փաստը դուրս եկավ, որովհետև դա խմբակցության ներքին խնդիրն էր, որը չէր ենթադրում իմպիչմենտ։ Մենք ներքին պայմանավորվորվածություն ունենք, եթե որոշակի թվով պատգամավորներ խնդիր ունեն՝ կապված կառավարության մեկ անդամի հետ, հարցը նման կերպ է դրվում»,- ասաց Բադալյանը։

Հարցին, թե Նիկոլ Փաշինյանի հրաժարականը ևս պահանջելո՞ւ եք` հաշվի առնելով, որ նա տապալել է երկրի անվտանգության հետ կապված իր խոստումը, Լուսինե Բադալյանը պատասխանեց․

«Հիմա դուք լուրջ ակնկալում եք, որ ես այդ հարցին պատասխանելո՞ւ եմ․ իհարկե, ոչ»,- ասաց նա՝ ցույց տալով, որ իր համարձակությունը չի ների նման քայլ անելու համար։

Հիշեցնենք, որ սա այն նույն պատգամավորն է, ով 2020 թվականի նոյեմբերի 9-ի կապիտուլյացիայի փաստաթուղթը ստորագրվելուց հետո որոշել էր վայր դնել մանդատը։ Ինչպես այն ժամանակ որոշ աղբյուրներ հայտնեցին, նա չարեց դա զուտ իր մասնակցությամբ նկարահանված որոշ խայտառակ տեսանյութեր ջրի երես չհանելու համար։