«Դավալուից ցախավելը հեծած» խոսքերն այսօր արդիական են դառնում

«Հանրապետություն» կուսակցության նախագահ Արամ Սարգսյանը հայտարարել է, որ խորհրդարանական առաջիկա ընտրություններին ինքը ևս մասնակցելու է.«2017-ի ընտրություններն ավելի ակտիվ են լինելու, քան մինչ այս եղած բոլոր ընտրությունները: Վստահաբար մենք մասնակցելու ենք: Բոլոր այն քաղաքական ուժերը, որոնց հետ ունենք գաղափարական ընդհանրություններ, որոնք չեն մասնակցել Մարտի 1-ի ոճրագործությանը և դրանից հետո մաս չեն կազմել այս իշխանությանն՝ արդարացնելով նրանց, մենք կարող ենք համագործակցել»,-ասել է նա:

Հիշեցնենք, որ Արամ Սարգսյանը 2012թ.-ի խորհրդարանական ընտրություններին ևս մասնակցել է, եղել է ՀԱԿ-ի ցուցակում, սակայն մանդատը վայր է դրել` նշելով, որ դա քաղաքական որոշում է: Հայտնի է, որ այդ ժամանակահատավածում ՀԱԿ-ի հետ լուրջ տարաձայնություններ են եղել: Եվ պատահական չէ, որ արդեն 2015 թ-ին «նոր միասնական ընդդիմության կոդավորած ստրատեգիական պլանը» ներկայացնելիս Լևոն Տեր-Պետրոսյանը Արամ Սարգսյանին էլ հիշեց. «Դավալուից ցախավելը հեծած, «մեկ պլյուս մեկ» քայլերգը շուրթերին եւ Պուտինի հրաժարականի պահանջը կրծքի տակ, հասնում են Ազատության հրապարակ, ինքնահռչակվում որպես նոր բեւեռ, ստորագրում քաղաքացիական պայմանագիրը, եւ շարժվելով դեպի Բաղրամյան 26, կյանքի կոչում «100-ամյակն առանց ռեժիմի» կարգախոսը»,- ասել էր նա:4

Դավալուի հատվածը կարելի է վերագրել «Հանրապետություն» կուսակցության առաջնորդ Արամ Սարգսյանին, Դավալու գյուղից ուրիշ քաղաքական գործիչ չունենք, որը քննադատած լինի Տեր-Պետրոսյանին:

Մանդատը վայր դնելուց հետո թեև Արամ Սարգսյանը ընդհատակ չի անցել, բայց ակտիվ քաղաքական գործունեություն էլ չի վարել, աչքի է ընկել միայն հարցազրույցներ տալով: Պարզ է, որ Արամ Սարգսյանի քաղաքական կշռի հիմնական գրավականը Վազգեն Սարգսյանի եղբայրը լինելն է, ու այս հանգամանքը կարծես պարզ է բոլորի համար: Արամ Սարգսյանը քաղաքականության մեջ, ըստ էության, սկսել է դերակատարության հոկտեմբերի 27-ից հետո: Քոչարյանի ժամանակահատվածում նշանակվում է վարչապետ, կարճ պաշտոնավարում, հետո իշխանությունից ընդդիմություն դառնում:

Այժմ ինչ քաղաքական հաշվարկներ է արել Արամ Սարգսյանը դժվար է ասել, բայց փաստ է մի բան` նախկին հեղինակությունը այժմ չունի, այս անգամ դժվար թե Վազգեն Սարգսյանի եղբայր լինելու հանգամանքը մեծ դերակատարություն ունենա: