Օրենք գրելը ձվածեղ ուտելու նման է, շատով չեն գրի

Ընտրական օրենսգրքի նախագծի խորհրդարանական քննարկումների ժամանակ «Բարգավաճ Հայաստան» կուսակցությունը ոչ միայն հանդես կգա իր առաջարկությունների փաթեթով, այլև պատրաստ է աշխատել քաղաքական բոլոր ուժերի հետ:
Այս մաին newspress.am-ի հետ զրույցում ասաց ԲՀԿ նախագահ Նաիրա Զոհրաբյանը:

Նրա խոսքով կուսակցության կողմից առաջարկվող փաթեթն արդեն պատրաստ է, կատարվում են վերջին ճշգրտումները:

«Ամեն դեպքում մենք օրենսգրքին ծանոթ չենք, առ այսօր այն խորհրդարանին չի ներկայացվել: Մենք կփորձենք հասկանալ, թե ինչ է ներկայացնում կառավարությունը: Իհարկե մեր փորձագիտական խումբը երկար ժամանակ է արդեն աշխատել է մեր առաջարկների վրա: Մենք հիմնական փաթեթն ունենք` կախված նրանից, թե ինչպիսի կառուցվածք է ունենալու ԸՕ, առաջարկները կարող են որոշակի փոփոխության ենթարկվել: Վերջնական փաթեթի մասին կխոսենք, երբ խորհրդարանում ունենանք ԸՕ տեքստը»,-ասաց ԲՀԿ նախագահը:

Նաիրա Զոհրաբյանն անիմաստ է համարում դատողություններ անել, թե ինչպիսին կլինի այդ ԸՕ տեքստը, քանի դեռ ձեռքի տակ չլինի փաստաթուղթը: Սակայն կուսակցության դիտարկումները անպայման կներկայացնեն քննարկումների ընթացքում:

«Ակտիվորեն մասնակցելու ենք, քանի որ 2017թ-ի խորհրդարանական ընտրությունները մեր երկրի համար վերջին շանսն է լինելու ու փորձաքարը, թե կարող ենք ի վերջո մեր երկրում մենք անցկացնել այնպիսի ընտրություններ, որ հերթական անգամ չարձանագրվի, թե չկա վստահություն ընտրական գործընթացի հանդեպ»,- նկատեց Զոհրաբյանը:

Նրա կարծիքով` ընտրական օրենսգրքի բարեփոխման խնդրին, յուրաքանչյուր քաղաքական ուժ պետք է վերաբերի մեծ պատասխանատվությամբ: Այս պարագայում, Նաիրա Զոհրաբյանը չի կարևորում, թե որ կուսակցությունն է ներկայացրել առաջարկը:

«Պիտի վեր կանգնեքն մեր կուսակցական ամբիցիաներից, վեր կանգնենք որոշ հարցերում միմյանց դեմ հակասություններ ունենալու խնդրից ու փորձենք հնարավորինս լայն կոնսենսուսով ունենալ այնպիսի օրենսգիրք, որը հնարավորություն կտա գնալ 2017 թ-ի ընտրական պրոցեսին»,- ասաց Զոհրաբյանը` հավելելով, թե ինքն իհարկե ռոմատիկ չէ և հասկանում է, որ ցանկացած օրենքից վեր ամենակարևորը քաղաքական կամքն է, բայց ըստ նրա` կարևոր է ունենալ մի օրենսգիրք, որը հնարավորինս կփակի ընտրակեղծարարության սողանցքները:

«Մենք պատրաստ ենք քննարկել ցանկացած ռացիոնալ առաջարկ, այդ թվում նաև ՀԱԿ-ի առաջարկը, որը մենք պաշտոնապես ստացել ենք և խմբակցության առաջիկա նիստում կքննարկենք այդ առաջարկները»,-եզրափակեց Զոհրաբյանը:

Չնայած ԲՀԿ առաջնորդի, ԸՕ-ի հետ կապված, ցանկացած առաջարկներ քննարկելու և ներկայացնելու պատրաստակամությանը, հարկ է նկատել, որ ԸՕ աշխատանքային խմբի անդամ Հրայր Թովմասյանը չի պատրաստվում որևէ առաջարկ ընդունել: Վերջինիս որակմամբ` «երկու բան կա, որ շատվորով չեն անում` մեկը օրենք գրելը, մյուսը` ձվածեղ ուտելը»:

Հիշեցնենք, որ ԸՕ-ը այսօր կառավարության նիստի օրակարգում է որից հետո կներկայացվի ԱԺ-ին: