Վանաձորում վեճն ավարտվել է դանակահարությամբ․ կասկածյալը ծալովի դանակը նետել է գետը

Սեպտեմբերի 27-ին արտակարգ դեպք է տեղի ունեցել Լոռու մարզում. Ժամը 23։30-ի սահմաններում ՀՀ ներքին գործերի նախարարության ոստիկանության Տարոնի բաժին են զանգահարել «Վանաձոր» բժշկական կենտրոնից և հայտել, որ «կրծքավանդակի ձախ կեսի կտրած-ծակած վերք, ձախ ազդրի կտրած-ծակած վերք» ախտորոշմամբ նույն օրը ժամը 23։00-ի սահմաններում շտապօգնության խումբը Վանաձորի «Շառլ Ազնավուրի» մշակույթի տան մոտից իրենց մոտ է տեղափոխել դանակահարված երիտասարդի, ում տվյալները հայտնի չեն, հաղորդում է Shamshyan.com-ը:

Տուժողը Լոռու մարզի բնակիչ 26-ամյա Տիգրան Կ․-ն է, ով սեպտեմբերի 27-ին ժամը 22։40-ի սահմաններում Տիգրան Մեծի պողոտայի 2 հասցեի մոտ վիճաբանել է Լոռու մարզի բնակիչ 20-ամյա Արարատ Ղ․-ի հետ, որի ժամանակ վերջինս իր մոտ եղած դանակով հարվածներ է հասցրել Տիգրան Կարապետյանի մարմնի տարբեր հատվածներին՝ պատճառել վերը նշված մարմնական վնասվածքները:

Ձեռնարկված միջոցառումներով և տարված բացատրական աշխատանքների շնորհիվ նույն օրը ոստիկանության Տարոնի բաժին է ներկայացել Արարատ Ղ․-ն և հայտնել է, որ սեպտեմբերի 27-ին ժամը 22։00-ի սահմաններում Տիգրան Մեծի պողոտայի 2 հասցեի մոտ անձնական հարցերի շուրջ ծագած վիճաբանության ժամանակ իր մոտ գտնվող ծալովի դանակով հարվածներ է հասցրել Տիգրան Կ․-ի մարմնի տարբեր մասերի, պատճառելով մարմնական վնասվածքներ, որից հետո հանցագործության առարկա հանդիսացող դանակը Նարեկացու փողոցի սկզբնամասում նետել է Փամբակ գետը:

Բաժին ներկայացած Արարատ Ղ․-ի աջ ձեռքի ցուցամատին առկա է եղել ակնհայտ մարմնական վնասվածք, որի շուրջ նա հայտարարել է, որ վնասվածքը ստացել է վերը նշված միջադեպի ժամանակ՝ իր ձեռքի դանակով անզգուշաբար ձեռքը վնասելու հետևանքով:

Դեպքի փաստով ոստիկանության Տարոնի բաժնում փաստաթղթեր են կազմվել, որոնք Արարատ Ղ-ի հետ միասին ներակայցվել են ՀՀ քննչական կոմիտեի Լոռու մարզային քննչական վարչություն։