Վարկաբեկել են Մարտուն Գրիգորյանին` որպես Գյումրու քաղաքապետի հավանական թեկնածուի

«Ստիպված ենք շատերին հիասթափեցնել: Մարտուն Գրիգորյանի բնակարանը գազով չի ջեռուցվում»,- այս մասին newspress.am-ի հետ զրույցում ասաց ԱԺ պատգամավոր Մարտուն Գրիգորյանի լրատվության պատասխանատու Լիզա Գասպարյանը` անդրադառնալով մամուլում շրջանառվող այն լուրերին, թե պատգամավորի շքեղ ապարանքը գողացված գազով է տաքացվում:

Նա ավելորդ համարեց գնահատական տալ հիշյալ հրապարակմանը և դրա շարժառիթներին ու դրդապատճառներին, քանի որ Գյումրիում քաղաքապետի ընտրություն է սպասվում և տպագրված հոդվածը նախընտրական քաղաքական խարդավանքների, ստի ու կեղծիքի ոլորտից է:

Նրա խոսքով, նյութը գրելուց առաջ, լրագրողը երեկոյան ժամը 22:35-ին զանգահարել է պատգամավորին գազի և էլեկտրաէներգիայի սպառման ծավալները պարզելու համար; Լիզա Գասպարյանը վստահեցնում է, որ դա պատվեր է եղել, քանի որ լրագրողը հստակ չի պատկերացրել իր անելիքն ու հարցադրումները ճիշտ չի ձևակերպել:

«Մարտուն Գրիգորյանը լրագրողին հորդորել է մինչև նյութը տպագրելը, զանգահարել Գյումրի՝ պատվիրատուին ու պարզի, թե ինչ պատվեր է իջեցված: Պատգամավորի օգնությամբ լրագրողը ճշգրտում է իր առաջադրանքը, հերքում ստանում, բայց, քանի որ պատվերն ընդունված էր, նյութը հրապարակվեց»,-ասաց Լիլիթ Գասպարյանը:

Բացասական գնահատելով որոշ լրատվամիջոցների այս օրինակ գործելաոճը, նա հորդորում է նման պարագայում խոսել փաստերով:

«Թե ով ինչքան է գազ սպառում և ինչքան վճարում, ամենալավը կիմանա մատակարար կազմակերպությունը: Սակայն, հրապարակման մեջ հիշատակված մուծումների չափերը չեն կարող էական լինել մեկ պարզ պատճառով`պատգամավորի տունը գազով չի ջեռուցվում և այս մասին վաղուց ի վեր տեղյակ է նաև «Հայռուսգազարդի» Շիրակի մասնաճյուղի ղեկավարությունը: Բայց դա էլ արդեն շատ չի հետաքրքրի պատվիրատուներին ու կատարողներին, որովհետև արդեն արվել է այն, ինչ պետք է արվեր. փորձել վարկաբեկել Մարտուն Գրիգորյանին որպես Գյումրու քաղաքապետի հավանական թեկնածուի»,- նկատեց Գասպարյանը:

Նրա դիտարկմամբ, Գյումրիիում բոլորը գիտեն, թե ով է նախաձեռնում և կազմակերպում պատգամավորի դեմ նմանատիպ նյութերի հրապարակումը: