ՀՀ արդարադատության նախարարը, փաստորեն, Սահմանադրությունը չի կարդացել. ըստ Անդրանիկ Քոչարյանի` Մինասյանի գրառումը «շատ վտանգավոր ու անթույլատրելի» էր

Արդարադատության արդեն նախկին փոխնախարար Սիրվարդ Գևորգյանի նշանակումից Ազգային ժողովի «Քաղաքացիական պայմանագիր» խմբակցության պատգամավոր Անդրանիկ Քոչարյանը դժգոհ է եղել: Այդ մասին այսօր Ազգային ժողվում լրագրողների հետ զրույցում ասաց ինքը` Քոչարյանը և անդրադարձավ նախարար Գրիգոր Մինասյանի ֆեյսբուքյան գրառմանը: 

«Ես կուզեի, որպեսզի Գրիգոր Մինասյանը Սահմանադրություն կարդա, ՀՀ արդարադատության նախարարը, փաստորեն, Սահմանադրությունը չի կարդացել և չգիտի, որ պատգամավորները խժդժություններով չեն զբաղվում: Նրանք Սահմանադրությամբ իրենց վերապահված լիազորություններն իրացնում են։ Ոչ մեկի համար գաղտնիք չի, որ մեր ժողովուրդը դժգոհ է երկրում արդարադատության ռեֆորմների ընթացքից կամ բովանդակությունից և կադրային քաղաքականությունից: Պարոն Մինասյանը շատ վտանգավոր, անթույլատրելի հայտարարություն է արել: Արդարադատության նախարարն ԱԺ պատգամավորներին մեղադրում է խարդավանքների մեջ: Դա, կներեք, Սահմանադրական կարգի հետ կապված մի հատ բանավոր տեքստ է, էդ ո՞նց: Այ դրա հետ կապված, եթե պարոն Մինասյանը մնալու է նախարար, ապա դրա հետ կապված պետք է գա այստեղ բացատրություն տա` ո՞վ է խարդավանքով զբաղվող պատգամավորը: Եթե պետք լինի, կհրավիրենք: Պարոն Մինասյանը, լավ կլինի, որ նորից Սահմանադրությունն ընթերցի»,- ասաց Քոչարյանը: