Նախկին ՀՀԿ-ականը ջղաձգվում է ու մեղադրում «նախկիններին»

Այսօր՝ սեպտեմբերի 26-ին, կառավարության նիստից հետո, Էկոնոմիկայի նախարար Գևորգ Պապոյանը բորբոքվեց ու ջղաձգվեց, երբ լրագրողներն ակնարկեցին Նիկոլ Փաշինյանի լայն ժպիտի մասին՝ Թուրքիայի նախագահ Էրդողանի հեղինակած գիրքը կրծքին սեղմելիս։

Պապոյանը ջղաձգումներով ու բորբոքված փորձում էր լրագրողներին վստահեցնել ու ինքն իրեն համոզել, թե իբր Փաշինյանն ինչ անում՝ հայերի ու Հայաստանի համար է անում ու, որ Հայաստանը մինչ օրս նախկինների պատճառով «շրջափակման» մեջ է հայտնվել։

«Այն, ինչ եղավ Հայաստանի հետ այսօր՝ նախկինների վարած քաղաքականության արդյունք էր․․․․ նախկիններն էին կորուստների պատճառը․․․ մի երկուսն օլիգարխ էին, մյուսներն ապրում էին աղքատության մեջ․․․»․․․ 

Այստեղ պետք է հիշեցնել Պապոյանին ու նրա նման մտածող մարիոնետներին, որ իր այսօրվա քաղաքական կնքահայրը ոչ միայն դեռ 2019 թվականի ապրիլի 8-ին հայտարարել էր, որ ԼՂ հակամարտության հարցի շուրջ բանակցություններն սկսելու է իր զրոյական կետից, այլև հետո խոստովանել էր, թե՝ հենց սկզբից պետք է ազնիվ լիներ, ու ասեր, որ Արցախի հարցը լուծվելու է Ադրբեջանի տարածքային ամբողջականության մեջ․․․

Սա մի կողմից․ մյուս կողմից էլ Պապոյանը մոռացել է իր քաղաքական հետագիծը (եթե իհարկե այն կարելի է հետագիծ որակել)։

Նրան պետք է հիշեցնել, որ երբ խոսում է նախկինների վարած ու չվարած քաղաքականությունից, չպետք է մոռանա, որ  2005-2018 թվականներին Գևորգ Պապոյանը անդամակցել է ՀՀԿ-ին, ասել է թե՝ այն ժամանակ գործող իշխանության մաս է կազմել, ապա հեռացվել՝ ներկուսակցական աշխատանքներին չմասնակցելու և կուսակցության կարգապահությունը խախտելու պատճառով։

Թեև Գևորգ Պապոյանն այս առթիվ ասել է, թե իբր իր անդամակցությունը բացառապես կրել է ֆիկտիվ բնույթ, սակայն փաստն այն է, որ այս մասին երբևէ չհիշատակելու և, հավանաբար, իր նշած «աղքատության» միջից դուրս գալու համար, Պապոյանը փորձել է «ջնջել իր հետագիծը»։

Համենայնդեպս, 2020 թվականի մարտի 7-ին Երևան քաղաքի ավագանու անդամ, «Լույս» խմբակցություն ղեկավար Դավիթ Խաժակյանը հայտնել է, որ 2019 օգոստոսի 2-ին «Gevorg papoyan parl» մականունով օգտատերը, ապա՝ 2020 թվականի մարտի 6-ին «Gevorg Papoyan 87» մականունով մեկը, փորձել են սրբագրել Գևորգ Պապոյանի կենսագրությունը Հայերեն Վիքիպեդիայում՝ հանելով Պապոյանի կենսագրության այն հատվածը, որտեղ ասվում է վերջինիս` 2005-2018 թվականներին «Հայաստանի Հանրապետական կուսակցությանն» անդամակցելու մասին։

Խաժակյանի պնդմամբ` մասնակիցների մականունները և կատարված խմբագրումների բովանադակությունը վկայում են այն մասին, որ սրբագրումները կատարել է հենց Գևորգ Պապոյանը, փորձելով «սրբագրել» սեփական կենսագրությունը։

Սա պարզապես ի գիտություն․․․

Այս ենթատեքստում արդեն զարմանալի չէ, որ իր իսկ պատմությունը, անցած ուղին ու գործունեությունը ջնջող-սրբագրող անձն ընդունակ է երկրի պատմական իրողությունները հերքել ու հայտարարել, թե՝  «Հայաստանի իրական անկախության օրը 2023 թվականի սեպտեմբերի 19-ին է», այսինքն՝ այն օրը, երբ Ադրբեջանը ագրեսիա սանձազերծեց Արցախի Հանրապետության նկատմամբ, ամբողջությամբ բռնազավթեց այն և իրականացրեց հայերի էթնիկ զտում։

Արմինե Մկրտումյան