Փաշինյանն ուզում է կոնսոլիդացնել վարչական լծակները. «Փաստ»

«Փաստ» օրաթերթը գրում է.

«Վերջերս մենք նշել էինք, որ Նիկոլ Փաշինյանը նորից իր «ռեպերտուարի» մեջ է, և ներքաղաքական «հարցեր լուծելու» իր սիրելի մեթոդը՝ «իրավական» գործիքակազմը, վերստին բերել է առաջին պլան: Այս թեմայի հետ կապված շատ փորձագետներ կարծում են, որ ցանկացած «գործ», դրվագ Փաշինյանն օգտագործելու է վճռական քայլեր գործադրելու համար՝ վարչական լծակներն իրենց ձեռքում կենտրոնացնելու համար։ Նախօրեին «Հանրապետության հրապարակ» տելեգրամյան ալիքն էլ, հղում տալով իր աղբյուրներին, նշել է, թե վերջին ձերբակալություններից հետո Նիկոլ Փաշինյանը հանձնարարել է կառավարությանը սեղմ ժամկետներում կուսակցական միասնականությունն ամրապնդել՝ պետական կառավարման մարմիններում։

Հիշեցնենք, որ օրերս ՔԿ-ն հաղորդագրություն էր տարածել այն մասին, որ Հայաստանի Հանրապետության ազգային անվտանգության ծառայության կողմից ձեռնարկված օպերատիվ-հետախուզական միջոցառումների արդյունքում տեղեկություններ են ստացվել՝ մի խումբ անձանց կողմից նախնական համաձայնությամբ իշխանությունը յուրացնելու նախապատրաստություն կատարելու մասին: Այդ գործողությունը ՀՀ իշխանությունները փորձեցին կապել «Արբատ» հայկական խմբավորման հետ, որը մասնակցում է ուկրաինական պատերազմին՝ ՌԴ-ի կողմից։ Ավելին, ալիքի աղբյուրները փոխանցում են, որ ՏԻՄ մարմինների աշխատակիցներին, ինչպես նաև պետական և բյուջետային տարբեր կազմակերպություններին հանձնարարված է մինչև հոկտեմբերի 10-ը ապահովել անկուսակցականների անդամակցումը ՔՊ-ին:«Չինովնիկներին վախեցնում են պարգևավճարների կրճատումներով, արձակուրդների հետաձգումներով, ինչպես նաև աշխատանքից հեռացումներով։ Իսկ «գաղափարական պատճառներով» հրաժարվողներին սպառնում են քրեական հետապնդումներով՝ կոռուպցիայի մասով կեղծված գործերով։ Բացի այդ, պահանջում են ՔՊ-ի օգտին քարոզչություն իրականացնել բնակչության շրջանում։ Ցանկանում են, որպեսզի աշխատակիցները ծառայողական սոցցանցերով և հասարակական միջոցառումների ընթացքում վարկաբեկեն ընդդիմությանն ու նրանց առաջ մղվող օրակարգը»,-գրում է ալիքը։

Սա, իհարկե, նորություն չէ: Այն հարցին, որ Նիկոլ Փաշինյանը փորձում է գնալ պետական կառույցների տոտալ քպացման ճանապարհով, մի քանի անգամ մենք անդրադարձել ենք: Հիմա, ինչպես երևում է, այդ գործընթացն ավելի կատաղի բնույթ է ստացել: Եվ դա իր պատճառներն ունի, որոնցից մեկն այն է, որ Նիկոլ Փաշինյանը հիանալի տիրապետում է ՔՊ-ի և իր ցածր վարկանիշի մասին տվյալներին՝ԱԱԾ-ի և այլ կառույցների զեկույցներից, և ցանկանում է կոնսոլիդացնել վարչական ռեսուրսը ՔՊ-ի շուրջ՝ արևմտամետ, հակառուսական օրակարգն առաջ մղելու համար։ Վերոնշյալ տելեգրամյան ալիքի հեղինակները կարծում են, որ վարկանիշի անկման պարագայում Փաշինյանը դիմում է վարչական ռեսուրսները հրահանգով և այլ մեթոդներով միավորելու գործողությանը, քանի որ Արևմուտքի՝ ԱՄՆ-ի և Մեծ Բրիտանիայի կողմից առաջ մղվող տրանսպորտային, լոգիստիկ նախագծերը պետք է ցանկացած գնով կյանքի կոչվեն, իսկ առաջին հերթին՝ «Խաղաղության խաչմերուկը»։ «Անգլո-սաքսոնական ուժերը, հենվելով իրենց դաշնակից Փաշինյանի և ՔՊ-ի վրա, ցանկանում են դուրս մղել ՌԴ-ին՝Հայաստանից և Հայաստանով անցնող էներգետիկտրանսպորտային, լոգիստիկ կարևորագույն նախագծերից։ Գործող իշխանությունները պատրաստ են անգամ ճնշումներ իրականացնել բիզնես էլիտաների վրա, որպեսզի նրանք նույնպես կոնսոլիդացվեն ՔՊ-ի և Փաշինյանի ու Արևմուտքի կողմից առաջ մղվող օրակարգերի շուրջ։

Հասկանալի է, որ ՔՊ-ն կանգ չի առնելու ոչնչի առջև՝ ուժայինների, դատարանների միջոցով ստիպելով տատանվողներին կամ ընդդիմադիր հայացքներով չինովնիկներին ընտրել՝ «կա՛մ Փաշինյանի հետ, կա՛մ քրեական գործերով դեպի բանտ»։ Փաշինյանի ներքաղաքական քայլերը խոսում են այն մասին, որ նա պատրաստվում է 2026թ.-ի ԱԺ ընտրություններին կամ հանրաքվեներին՝ այդ առումով նրան անհրաժեշտ է կուռ՝ իր ենթակայության տակ գտնվող պետական ապարատ՝ լոյալ չինովնիկների բանակ։ Պետական բուրգը պետք է գտնվի Փաշինյանի ուղիղ հսկողության տակ, որպեսզի Փաշինյանը շարունակի կյանքի կոչել արևմտյան քաղաքական օրակարգը՝ ապահովագրելով իր «թիկունքը» և ներքաղաքական դաշտն ենթարկեցնելով ՔՊ-ին։ Քանի դեռ ընդդիմությունը պասիվ է և ակտիվ գործունեության առումով «թայմ-աութ» է վերցրել՝ Փաշինյանը այդ դադարն օգտագործելու է ընդդիմության շարքերը պառակտելու՝ ընդդիմադիր էլեկտորատին դեպի իրեն քաշելու և ընդդիմության հսկողության տակ գտնվող որոշակի վարչական լծակները չեզոքացնելու համար»,-գրում են ալիքի հեղինակները՝ հավելելով, որ, այսպիսով, Փաշինյանը ցանկանում է «մաքրել» հայաստանյան ներքաղաքական դաշտն ընդդիմադիր, հակափաշինյանական օջախներից՝ ճնշել ընդդիմությանն ու ողջ պետական ապարատը դարձնել վերահսկելի։

Նշվում է, որ դա իրականացնելու համար ՔՊ-ն գործի է դնելու թե՛ կոմպրոմատները չինովնիկների դեմ, թե՛ ԱԱԾ-ն, թե՛ աշխատանքից ազատելու «մտրակը»։ Ըստ հեղինակների, Փաշինյանն Արևմուտքի օրակարգը սպասարկելու և իշխանության մնալու համար գործի է դնելու բոլոր մեխանիզմները՝ նա ցանկանում է ՀՀ-ն դարձնել «հակառուսական օջախ» Հարավային Կովկասում, ինչը բխում է թուրք-ադրբեջանական տանդեմի և նրանց կուրատոր՝ անգլո-սաքսոնական դաշինքի երկարաժամկետ աշխարհաքաղաքական շահերից»։

Մանրամասները՝ «Փաստ» օրաթերթի այսօրվա համարում։