Կրթական «բարեփոխումներից» գոհ մնացին միայն նախարարությունում ու «դասագրքերի» հեղինակները․․․ ուսուցիչները՝ ԿԳՄՍ նախարարին

ԿԳՄՍ նախարարի պաշտոնը զբաղեցնող Ժաննա Անդրեսայանն ուսուցիչների համատարած դժգոհության համատեքստում ֆեյսբուքյան իր էջում գրել է.

«Հարգելի տնօրեններ, ուսուցիչներ,

խնդրում եմ այստեղ գրել բոլոր այն խնդիրները, որ տեսնում եք նոր չափորոշչի ներդրման հետ կապված՝ լինեն դրանք ոչ բավարար հստակ կամ միանշանակ պարզաբանումներ, կամ ձեր տպավորությամբ բաց մնացած հարցեր, որոնց պատասխանները հստակ չեն։

Կանխավ շնորհակալ եմ բոլոր արձագանքների համար, պիտի խնդրեմ միայն գրել հնարավորինս կոնկրետ ու թիրախային, որ հարցերին հնարավոր լինի հասցեական արձագանքել։ Ձեր դիտարկումները կօգնեն նաև բարելավել չափորոշչի ներդրման գործընթացը»։

Արդյունքում նախարարի պաշտոնը զբաղեցնող Անդրեասյանի էջում հարյուրավոր դժգոհություններ, բողոքներ ու առաջարկներ են ներկայացվել։

Բողոքների գերակշիռ մասը վերաբերում է էլեկտրոնային մատյանը լրացնելուն, բողոքների մի մասն ուղղված են ԿԶՆԱԿ-ին։

NEWSPRESS.am-ը ներկայացնում է դրանցից մի քանիսը

Տ. Ղ - Կխնդրեմ, որ ինքներդ մեկ դրույք ծանրաբեռնվածությամբ փորձեք լրացնել էլեկտրոնային մատյանը, հետաքրքիր է` ինչպես կկարողանաք տնօրինել ժամանակը։ Սա ուղղակի տանջանք է, որը ոչ մի նպատակ չի հետապնդում և ոչ մի աղերս չունի գիտելիքի ու դասավանդման գործընթացի հետ։ Գուցե պարզաբանեք, փորձենք հասկանալ, որովհետև ոչ մի կերպ չի ստացվում այդ չարչարանքը կապել ուսումնական գործընթացի հետ։ Հեգնանքս թող ավելորդ չթվա, բայց սա ուսուցչին դիտավորյալ փակուղու առաջ կանգնեցնելու միտում ունի։

Լ․Կ -Էլեկտրոնային մատյանները եթե պարտադիր են, ուրեմն հատուկ աշխատակիցներ թող լինեն, որ լրացնեն այդ ամենը, ուսուցիչները շատ ծանրաբեռնված են, շատերն անգամ տետրերը չեն հասցնում ստուգել այդ մատյանների պատճառով, իսկ դա արդեն բարելավում չէ։

Ուսուցիչը պետք է թարմ ուժերով մտնի դասարան՝ ոչ թե սպառված։

Ոչ բոլոր ուսուցիչներն ունեն համակարգիչներ կամ արագ աշխատող հեռախոսներ, ինտերնետ․․․ դա հավելյալ ծախս է, որը պետությունը չի տրամադրում, իսկ դպրոցում 1-2 համակարգչով դա չի կարող իրականացվել։

Պետք է այս ամենը հաշվի առնել։

Վ․ Ն -Հարգելի տիկին Անդրեասյան, խնդրում ենք էլեկտրոնային մատյաների լրացնելու նոր կարգը կրճատել, դա հոգեբանական լարվածություն է առաջացրել համարյա բոլոր ուսուցիչներիս մոտ, խնդրում եմ մի անտեսեք մեր կարծիք և փորձեք ըմբռնումով մոտենալ։

Հ․Խ -Բարև Ձեզ, տիկին Անդրեասյան, կուզեի նշել, որ ուսուցիչը էկրանի մոտ սարսափելի երկար ժամանակ է անցկացնում, անգամ այն ուսուցիչը, ով գործիքակազմին լիարժեք տիրապետում է, թեմատիկ պլան, ձևավորող գնահատում, անհամար վերապատրաստումներ, այս ամենի արդյունքում մենք տուն ենք գալիս գերհոգնած և միակ բանը, որ կարող ենք անել հաջորդ օրվա դասին պատրաստվելու փոխարեն, երազում ենք մի փոքր հանգստացնել մեր աչքերն ու ողնաշարը։

Միանում ենք վերապատրաստման, որտեղ ընդամենը սահիկ են կարդում մի քանի ժամ շարունակ, կարելի է ուղղակի հստակ ձևակերպել ասելիքը, ուղարկել դպրոցներին, մենք էլ կտպենք և կկարդանք։

Շնորհակալություն։

Բ․Շ․ -Էլեկտրոնային մատյանի անիմաստ պատճենումներն ինչ են տալիս ուսուցչին կամ աշակերտին.ասում եք՝ուսուցիչը ստեղծագործ անձ է,ապա ինչո՞ւ եք այսքան կաղապարում մեզ և նվաստացնում։ Մի անգամ հարցում կամ քննարկում կազմակերպեք երիտասարդ ուսուցիչների հետ և կտեսնեք, թե ինչքան է հիասթափվում նա ամեն օր ձեր ներկայացրած պահանջներից։

Վ․Հ․- ...մատյանների հարցը առաջ է քաշվել, որ դասագրքերի, ծրագրերի ու 12 ամյաի հարցը 2֊րդ պլան մղվի։ Ես պետական համակարգում չեմ աշխատում, բայց կարող եմ ապացուցել, որ լինելով իրենց հրահանգներից դուրս բազմապատիկ ավելի արդյունավետ եմ ու թող ասեն (կուզենայի կառավարությունը) ինչու՞․․․

Ն․Ազ․- Այս «բարեփոխումներից» կարծում եմ՝ միայն նախարարությունում գոհ մնացին։ Գոհ մնացին նաև «դասագրքերի» հեղինակները։ Ստորացված զգացին ուսուցիչները։ Անգրագետ են դառնում աշակերտները։ Շվարած են ծնողները»։

Այո, կարդացեք մեկնաբանությունները, որտեղ չկա գոնե մեկ շնորհակալական խոսք։ Այս մեկնաբանությունները ԿԳՄՍՆ-ին ուղղված գնահատականներ են, դրանցով կարող եք չափել նախարարության կողմից տարվող աշխատանքների «արդյունավետությունը»։

Ուսուցիչներն այլ աշխատանքներ են փնտրում։ Դպրոցն իր հսկայական աշխատանքով ու չնչին վարձատրությամբ դարձել է աշխատողների սթրեսի հիմնական աղբյուրը։ Մի քանի տարի հետո պատկերացնում եմ եկող սերնդի «առաջադիմության» մակարդակը։

Դա էլ ունի իր նպատակը՝ ձևավորում ենք հնազանդ, ենթարկվող, սեփական մտքերը չունեցող ու չարտահայտող, հեշտ կառավարվող հասարակություն....