Ուզում եմ երջանկությունն էլ որպես քաղաքական նպատակ ձևակերպել․ արգելել եմ ՀՀ ուղարկել օգտագործված շորեր, ավտոներ, կիսամաշ կոշիկ ու պագրիշկա․ Փաշինյան

Ինչ եմ ակնկալում ես որպես ՀՀ քաղաքացի․ ես ակնկալում եմ, որ մենք առաջին հերթին դադարենք Հայաստանն ընկալել որպես ֆորպոստ։ Հայաստանը ֆորպոստ չէ»։ Այս մասին հայտարարեց Նիկոլ Փաշինյանը՝ Հայկական երկրորդ գլոբալ գագաթնաժողովի ժամանակ։

Նա նշեց, որ Հայաստանն ինքնիշխան պետություն է, որի միակ ֆունկցիան պետք է լինի իր քաղաքացիների անվտանգությունն ու բարեկեցությունն ապահովելը։

«Ֆորպոստում երջանկությունը նպատակ չէ, ֆորպոստում մաքառումն է նպատակ։ Ուզում եմ երջանկությունն էլ որպես քաղաքական նպատակ ձևակերպել, բայց հիմա կասեն՝ ո՞նց եք երջանկացնելու մարդկանց։ Երջանկացնելու մասին չէ խոսքը, այլ երջանկությունը հնարավոր դարձնելու մասին․ ամեն մեկն ինքը թող որոշի՝ ինչպես է երջանիկ լինելու»,- ասաց նա՝ հավելելով, որ մարդը երջանիկ է, երբ խաղաղ միջավայրում է ապրում։

Նա նշեց, որ նաև ուզում է, որ Հայաստանը դադարի կարեկցանքի օբյեկտ լինել և դուրս գա այդ կարգավիճակից։

«Ես արգելել եմ, չգիտեմ` ինչքանով են կատարում, որ Հայաստան օգտագործված շորեր, օգտագործված ավտոներ, կիսամաշ պագրիշկա ուղարկեն, կիսամաշ կոշիկ ուղարկեն պետական հիմնարկների, մանկատների համար։ Կներեք, բայց Հայաստանի կառավարությունն ի վիճակի է իր պատասխանատվության  ներքո գտնվող հիմնարկների համար մինիմում ապահովել։ Պետք չէ կիսամաշ հագուստ ու ժամկետանց դեղ ուղարկել և մի ամիս լուսաբանել։ Ես հաշտ չեմ, կոնֆլիկտ ունեմ այդ ընկալման հետ»,- ասաց Փաշինյանը;