Իրանը պատրաստ է Սյունիքում ռազմական ուժ կիրառել Ռուսաստանի դեմ. Middle East Eye

Ինչպես լոնդոնյան Middle East Eye վերլուծական հրատարակությանն է  հայտնում, հղում անելով Իրանի արտաքին գործերի նախարարության աղբյուրներին, Իսլամական Հանրապետությունը Զանգեզուրի միջանցքում Ռուսաստանի դիրքորոշումը համարում է սպառնալիք իր շահերին և իրանա-հայկական սահմանի արգելափակման դեպքում պատրաստ է օգտագործել ռազմական ուժ:

Թեհրանի աղբյուրները պարզաբանում են, որ օգոստոսի 19-ին Բաքվում Զանգեզուրի միջանցքի վերաբերյալ ՌԴ ԱԳ նախարար Լավրովի հայտարարությունը Իսլամական Հանրապետության կողմից ընկալվել է որպես ռազմավարական սպառնալիք իր շահերին։ Թեհրանում Ռուսաստանի դեսպան Ալեքսեյ Դեդովը կանչվել է ԱԳՆ, որտեղ նրա ուշադրությանն են ներկայացվել Թեհրանի մտահոգությունները։

«Պաշտոնապես մենք դա «դեսպանի կանչ» չենք անվանել», - պարզաբանել է Իրանի արտաքին գործերի նախարարության բարձրաստիճան աղբյուրը Middle East Eye-ին անանունության պայմանով:

«Բայց նման անմիջական հանդիպում անցկացնելով՝ մենք հստակ ազդարարեցինք Մոսկվային, որ դժգոհ ենք, և որ նրանց դիրքորոշումը հակասում է մեր դիրքորոշմանը»։

Նույն աղբյուրն ընդգծել է, որ Իրանի կառավարությունը հետևողականորեն և հաստատակամորեն հավատարիմ է այն դիրքորոշմանը, որ Զանգեզուրի միջանցքը պետք է մնա Երևանի վերահսկողության տակ։